डा. बद्री केसी उद्योग वाणिज्य प्रवर्द्धन सम्वाद परिषद्को पदेन सदस्यमा मनोनीत
काठमाडौँ/ गैर आवासीय नेपाली संघ (एनआरएनए) केसी समूहका अध्यक्ष डा. बद्री केसीलाई प्रधानमन्त्री केपी शर्मा ओलीले उद्योग वाणिज्य प्रवर्द्धन सम्वाद परिषद्को पदेन सदस्यमा मनोनयन गरेका छन्। उद्योग वाणिज्य प्रवर्द्धन सम्वाद परिषद् (गठन) आदेश, २०७५ बमोजिम मिति २०८१/९/५ मा भएको निर्णयअनुसार अध्यक्ष डा केसीलाई उद्योग वाणिज्य प्रवर्द्धन सम्वाद परिषद्को पदेन सदस्यमा मनोनयन गरिएको जनाइएको छ।
केसीले मनोनयनको प्रति प्रधानमन्त्रीलाई धन्यवाद दिएका छन्। ‘गैर आवासीय नेपाली संघको अध्यक्षको हैसियतले मलाई उक्त समितिको सदस्य मनोनयन गरेकोमा प्रधानमन्त्रीज्यूसहित समस्त नेपाल सरकारलाई हार्दिक धन्यवाद दिन चाहन्छु ।ʼ केसीले भने।
सार्वजनिक–निजी क्षेत्र बिच नियमित संवाद गरी आर्थिक विकासमा सहयोग पुर्याउन २०७५ असोज ५ गतेको मन्त्रिपरिषद्को निर्णयबमोजिम जारी भएको गठन आदेशका आधारमा उक्त परिषद् सञ्चालनमा आएको हो ।
परिषद्को सदस्यमा गैर आवासीय नेपाली संघ,नेपाल उद्योग वाणिज्य महासङ्घलगायत राष्ट्रिय संस्था र व्यावसायिक प्रतिनिधिलाई प्रधानमन्त्रीले हालै मनोनयन गरेपछि परिषद्को पहिलो बैठक मंगलबार (माघ २९,२०८१) सम्पन्न भएको छ ।
उक्त बैठकमा सरकारका तर्फबाट भएका आर्थिक एवं प्रशासनिक सुधारका प्रयासहरू, अध्यादेशमार्फत २९ कानुनमा गरिएको संशोधन र त्यसका सकारात्मक प्रभावहरू, विकास निर्माणमा भएका प्रगतिहरू, स्टार्ट अप र व्यापार सहजीकरणको लागि गरिएका पहलबारे अवगत गराइएको केसी समूहको सचिवालयद्वारा जारी विज्ञप्तिमा उल्लेख छ।
बैठकले उत्पादन, पूर्वाधार, सामाजिक, व्यापार, निर्यात र शासकीय तथा प्रशासनिक गरी विभिन्न क्षेत्रमा परिषद्अन्तर्गतको समिति गठन गर्ने निर्णय गरेको छ । ती समितिले क्षेत्रगत समस्या र समाधानका विषयमा छलफल गरी परिषद्लाई सुझाव दिनेछन् ।
अध्यक्ष डा केसीले परिषद्को बैठकमा मंगलबार आफ्नो सुझाव पेश गर्दै गैर आवासीय नेपालीहरूलाई लगानीका लागि आकर्षित तथा प्रोत्साहित गर्न संविधान प्रदत्त आर्थिक सामाजिक तथा सांस्कृतिक अधिकार कार्यान्वयन गर्नुपर्नेमा जोड दिएको जनाइएको छ।
