पोखरामा सहकारी पीडित नभई रास्वपाका कार्यकर्ताले हुल हुज्जत गरे : शिवाकोटी

काठमाडौँ । नेपाली कांग्रेसका केन्द्रीय सदस्य अजयबाबु शिवाकोटीले सहकारी पीडितलाई महामन्त्री गगन थापाले भेट नदिएको भन्ने हल्ला निराधार भएको बताएका छन् । उनले सहकारी पीडितको नाममा राष्ट्रिय स्वतन्त्र पार्टी(रास्वपा)का कार्यकर्ताले घुसपैठ र हुल हुज्जत गरेको समेत बताए ।
दुई दिने राजनीतिक भेटघाटका लागि पोखरा पुगेका महामन्त्री थापाले सहकारी पीडितहरूलाई भेट्न इन्कार गरेको कुरामा सत्यता नभएको भन्दै शिवाकोटीले भने,‘दुई दिनको भेटमा महामन्त्रीले करिब १६ सय मान्छेलाई व्यक्तिगत र संस्थागत रूपमा भेट्नुभएको छ । सहकारी पीडितका नाममा चाहिँ रास्वपाका कार्यकर्ताहरूले कालो मास्क लगाएर हुल हुज्जत गरे । म पनि महामन्त्रीसँगै भ्रमणमा छु । सहकारी पीडितले आधिकारिक र संस्थागत रूपमा भेट्ने प्रयास गरेको मलाई थाहा भएन । भेट्ने सेड्युल नै भएजस्तो लाग्दैन । तर पीडितहरूका पक्षमा महामन्त्री मात्र होइन सिङ्गो कांग्रेस गम्भीरताका साथ लागिरहेको छ ।’
सहकारी पीडितका वास्तविक व्यक्तिहरू नभई रास्वपाका कार्यकर्ताहरूले महामन्त्रीलाई बदनाम गराउन खोजेको शिवाकोटीले बताए।
कांग्रेस कास्कीको पार्टी कार्यालयमा आइतबार दिनभर राजनीतिक भेटघाट गर्नमा व्यस्त रहेका महामन्त्री थापाले सहकारी पीडित संघर्ष समिति कास्कीका संयोजक एवम् हालका सूर्यदर्शन सहकारी सञ्चालक समितिका अध्यक्ष किरण श्रेष्ठलगायतका सहकारी पीडितलाई भेट्न इन्कार गरेको भन्ने समाचारमा सत्यता नभएको उनको भनाइ छ ।
पोखरा पार्टी कार्यालय अगाडि पीडितहरू नभई रास्वपाका १०–२० जना कार्यकर्ताहरू जम्मा भएर हुल हुज्जत गर्ने प्रयास गरेको र उनीहरूलाई प्रहरीले चिप्लेढुगा कटाएको उनले बताए ।