विश्व व्यापी शान्ति स्थापनाका लागि सूचना आदान प्रदान प्रभावकारी बनाउनु पर्छ : प्रधानमन्त्री
काठमाडौँ । प्रधानमन्त्री, पुष्पकमल दाहाल प्रचण्डले, नेपालका सुरक्षा निकायले विश्वमा शान्ति स्थापनाका लागि खेलेको भूमिकाको खुलेर प्रशंसा गरेका छन् ।
प्रहरी सहकार्यको अन्तर्राष्ट्रिय दिवस तथा इन्टरपोलको १००औँ वार्षिकोत्सवको अवसरमा काठमाडौँमा आयोजित कार्यक्रममा उनले संयुक्त राष्ट्रसंघसँग नेपाली सुरक्षा बलहरूको सहकार्यले नेपालमा मात्र नभई विश्वभरका द्वन्द्वग्रस्त क्षेत्रमा पनि शान्ति, स्थिरता र विधिको शासन प्रवर्द्धन गर्न महत्त्वपूर्ण भूमिका खेलेको बताए ।
उनले भने ‘हाम्रा अधिकारीहरूले संयुक्त राष्ट्र शान्ति मिसनहरूमा भाग लिएका छन्, खतरनाक स्थानहरूमा र अविश्वसनीय रूपमा कठिन परिस्थितिहरूमा शान्ति र सुरक्षामा योगदान पुर्याएका छन् र उनीहरूले अहिले पनि शान्तिको लागि आफ्नो जीवन जोखिममा राखिरहेका छन्। ’
त्यस्तै उनले अहिलेको डिजिटल युगमा, प्रविधिको दुरुपयोग गरी नराम्रा क्रियाकलापहरू सञ्चालन गर्नेहरूको निगरानीको लागि अन्तर्राष्ट्रिय प्रहरीको भूमिकालाई नकार्न नसकिने उल्लेख गरे ।
‘विश्वले अभूतपूर्व चुनौतीहरूको सामना गरिरहेको छ, जसमा अन्तर्राष्ट्रिय संगठित अपराध, साइबर खतरा र आतङ्कवादको वृद्धि समावेश छ। यी धम्कीहरूले सिमाना पहिचान गर्दैनन् र अन्तर्राष्ट्रिय समुदायबाट सामूहिक प्रतिक्रिया चाहिन्छ। यस सन्दर्भमा, म सबै राष्ट्रहरूलाई विश्वव्यापी, क्षेत्रीय र उप–क्षेत्रीय स्तरहरूमा अन्तर्राष्ट्रिय सहयोग सुदृढ गर्न आग्रह गर्दछु।’ उनले भनेका छन् ‘यी उदीयमान खतराहरूलाई प्रभावकारी रूपमा लड्न हामीले सूचना आदानप्रदान र क्षमता निर्माणलाई बढाउनुपर्छ।’
त्यस्तै सो कार्यक्रममा गृहमन्त्री नारायणकाजी श्रेष्ठले, बदलिँदो विश्वमा प्रहरी संगठनको भूमिका झनै चुनौतीपूर्ण र अत्यावश्यक भएको बताए ।
नेपाल प्रहरी प्रमुख वसन्त कुवरले सुरक्षा निकाय जस्तो सुकै कठिन परिस्थितिमा पनि शान्ति सुरक्षाका लागि तयार रहनु पर्ने कुरालाई स्मरण गर्दै काममा लाग्नुको विकल्प नभएको बताए ।
