सत्तारुढ गठबन्धनबाट एनआरएनएमा को बन्ला त उम्मेदवार?

पेन्सिलभेनिया । सन् २००३ मा स्थापना भएको विदेशमा बस्ने नेपालीहरुको साझा संस्था गैर आवासीय नेपाली संघ एनआरएनए यतिबेला ११ औं विश्व सम्मेलन तथा महाधिवेशनको संघारमा उभिएको छ ।

दक्षिण एसियाली राष्ट्र (सार्क) बाहेकका ८६ देशमा शाखा रहेको एनआरएनएको एनसीसीको अधिकांश अधिवेशन सकिएपछि अहिले (केन्द्र) आईसीसीको निर्वाचनका लागि आन्तरिक जोडघटाउ सुरु भएको छ । आउँदा असोज ३० गतेदेखि कार्तिक ३ गतेसम्म काठमाडौंमा हुने विश्व सम्मेलन तथा महाधिवेशनले नयाँ नेतृत्व चयन गर्ने पक्का छ । यसअघिको १० औं सम्मेलन त्यति सार्थक नदेखिएको अवस्थामा अहिले नयाँ कार्यासमिति निर्माणका लागि सबैले आफ्नो तयारी सुरु गरिसकेका छन् । कतिले सामाजिक सञ्जालबाट र कतिले भर्चुअल माध्यम (जुम)बाट उम्मेदवारी घोषणा गर्ने लहर नै चलेको छ ।

अहिले नयाँ नेतृत्वका लागि ६ जना देखिएका छन् । तर निर्वाचनको मिति आउँदै गर्दा त्यो संख्या आधा र चुनावकै कुरा गर्ने हो भने २ जनाकाबीचमा मात्रै प्रतिस्पर्धा हुने पक्का छ ।

एनआरएनएमा पनि नेपालको सत्ता राजनीति पनि हावी हुँदै आएको छ । नेपालमा बस्दा कुनै न कुनै  संगठनको सदस्य रहेकाहरु अहिले विदेशमा जाँदा पुरानो दलको प्रभाव पर्नु स्वभाविक मानिए पनि कतिका व्यापार र नाता सम्बन्धले पनि यसमा प्रभाव पर्ने गरेको छ ।

अहिलेसम्म वर्तमान अध्यक्ष डा. बद्री केसी, अध्यक्ष रविना थापा, उपाध्यक्ष महेश श्रेष्ठ, उपाध्यक्ष आरके शर्मा, उपाध्यक्ष हेमराज शर्मा र महासचिव डा. केशव पौडेल नेतृत्वको तयारीमा रहेका छन् । यसैगरी उपाध्यक्षदेखि महासचिवसम्म र आईसीसी सदस्यसम्मका उम्मेदवारी घोषणा भने भइरहेको अवस्था रहे पनि चुनावसम्म धेरै फिल्टर पनि हुने छन् ।

अहिलेको सत्ता समिकरणका अनुसार नेपाली कांग्रेस, माओवादी केन्द्र र एकीकृत समाजवादी एक ठाउँमा उभिएका छन् । जसमा नेपाली कांग्रृेस निकट उपाध्यक्ष महेश आचार्य र महासचिव डा. केशव पौडेलले अध्यक्षको उम्मेदवार बन्ने तयारी गर्दा माओवादी केन्द्रबाट उपाध्यक्ष आरके शर्माले पनि अध्यक्षको तयारी सुरु गरेका छन् ।

महेश, आरके र केशव मध्य एक जना सत्तारुढ गठबन्धनको अध्यक्ष उम्मेदवार  बन्ने छन् । रविना थापा पनि नेपाली कांग्रेस निकट भए पनि उनी एक कार्यकाल अध्यक्ष भइसकेकाले उनलाई कसैले पनि अहिले गणनामा राखेका छैनन् । 

एनआरएनएको अध्यक्षको उम्मेदवार बनाउने विषयमा सत्तारुढ गठबन्धनका शीर्ष नेताहरु माओवादी केन्द्रका अध्यक्ष तथा प्रधानमन्त्री पुष्पकमल दाहाल प्रचण्ड, नेपाली कांग्रेसका सभापति शेरबहादुर देउवा, एकीकृत समाजवादीका अध्यक्ष माधवकुमार नेपाल र नेपाली कांग्रेसकै उपसभापति पूर्णबहादुर खड्काले सहमति जुटाउने प्रयास गरेको बालुवाटार स्रोतले समाजटाइम्सलाई बताएको छ ।

अहिलेसम्मको उम्मेदवार छनोटका विषयमा ३ पटक जति छलफल हुँदा प्रधानमन्त्री प्रचण्ड आरकेको पक्षमा बलियोगरी प्रस्तुत भएका छन् भने शेरबहादुर र पूर्णबहादुरले अध्यक्षको उम्मेदवार नेपाली कांग्रेसले अघि सारेको व्यक्ति हुनुपर्ने बताउँदै आएका छन् । १० औं विश्व सम्मेलनका बेला पनि यस्तै लफडा हुँदा कुल आचार्यलाई शेष घलेको टिमबाट यता ल्याएपछि अहिलेको संस्थापन पक्ष बलियो भएको र कुलले पनि जम्मा ६ महिनामात्रै अध्यक्ष भएकाले त्यसको क्षतिपुर्ति अहिले माओवादीले आरकेलाई ब्याक गराएर महेश र केशवमध्य एक जनालाई अध्यक्ष बनाउनुपर्ने अडान राखेको पनि बुझिएको छ । 

तर, यस विषयमा सहमतिमै जाने अहिले नै कुनै निर्णय नगर्ने सहमतिपछि बालुवाटारमा पछिल्लो समय यो विषयमा छलफल हुन छाडेको छ । अब प्रतिनिधि दर्ताको काम सुरु भएको र त्यसको आधारमा पछि निर्णय गर्ने बुझिएको छ ।

यता, नेपाली कांग्रेसमा पनि महेश र केशबमध्य एक जना कसलाई छनोट गर्ने भन्ने समस्या पनि रहेको छ । जापानका महेशको पक्षमा पूर्णबहादुर खड्का खुलेरै लागेका छन् भने केशबमाथि सफ्ट कर्नरमा शेरबहादुर देउवा रहेका छन् । अमेरिकाका केशव तनहुँकै र राष्ट्रपति रामचन्द्र पौडेलको पनि इन्ट्रेस्ट बुझ्ने पक्षमा कांग्रेस सभापति देउवा रहेको बुझिएको छ ।

तर, यसबिचमा अमेरिकाकै बुद्धिसागर सुवेदीले महासचिवमा उम्मेदवारी घोषणा गर्दा केशवलाई केही अप्ठेरो पर्ने अवस्था पनि देखिएको छ । बुद्धि केशवकै मान्छे हुन् । तर, अमेरिकाबाटै अध्यक्ष र महासचिव बनाउन नसकिने भन्दै यस पटक अमेरिकाबाहिरबाट अध्यक्ष बनाउनका लागि पहल भएको पनि बुझिएको छ । त्यस्तो भएको खण्डमा कांग्रेसले महेश र माओवादीले आरकेलाई अघि सार्दा दुई मध्य एक जना उम्मेदवार बन्ने छन् । वर्तमान महासचिवमा गौरीराज जोशीले पनि उम्मेदवारी घोषणा गरे पनि उनी बद्री केसीको प्यानलबाट उम्मेदवार हुने छन् ।

तर, महेश कतै बद्री केसी नै उम्मेदवार भए भने उनलाई छाड्छन् की भन्ने आशंका रहँदा केशव र आरेकलाई स्ट्याण्डबाई राख्नेसम्मको कुरा भएको छ । तर महेशले निकटवर्तिसँग आफू अध्यक्षको उम्मेदवार हुँदा वद्री सघाउने कुरामा ढुक्क देखिन्छन् ।

सत्ता समिकरण अनुसार अहिलेको अवस्था अगाडि बढेमा महेश श्रेष्ठ अध्यक्ष हुँदा आरके उपाध्यक्षमै दोहोरिने अवस्था बन्ने छ भने केशव पनि उपाध्यक्ष हुने छन् । सत्तारुढ गठबन्धनको महासचिव भने बुद्धि सागर सुवेदी नै हुने पक्का जस्तै देखिए पनि अन्तिममा राजनीतिक समिकरण मिलाउँदा जो पनि सहीद हुने सम्भावना पनि उत्तिकै छ । यदि आरके उपाध्यक्ष नै बस्दा उनले आफू निकटलाई महासचिवको उम्मेदवार बनाउने सम्भावनालाई पनि नकार्न सकिन्न ।

उता, बद्री केसी, हेमराज शर्माहरुले पनि अर्को प्यानल बनाउने अवस्था पनि छ ।