पूर्व गृहमन्त्री रविको निर्णय खारेज, जग्गा कित्ताकाट खुल्यो
काठमाडौं । पूर्व गृहमन्त्री रवि लामिछाने ३२ दिन मन्त्री भएका बेला राष्ट्रिय परिचयपत्रबारे गरेको निर्णय सरकारले खारेज गरेको छ ।
सिंहदरबारमा आज बसेको मन्त्रिपरिषद् बैठककले राष्ट्रिय परिचयपत्र सम्बन्धि व्यवस्थापन सूचना प्रणालीमार्फत सुरक्षित तवरले नागरिकको विवरण प्रमाणिकरण तथा अन्तर आवद्धता सम्बन्धि बनेको कार्यविधिमा व्यक्तिगत डाटा र राज्यको सुरक्षाको कुराहरु निजी कम्पनीलाई दिने निर्णय खारेज गरेको सरकारी प्रवक्ता सूचना तथा सञ्चारमन्त्री रेखा शर्माले जानकारी दिइन् ।
सरकारले कार्यविधिका विषयमा अध्ययन गर्नको लागि छुट्टै समिति बनाउने निर्णय गरेको पनि सञ्चारमन्त्री शमाले बताइन् ।
यस्तै आजको मन्त्रिपरिषद् बैठकले लामो समयदेखि रोकिएको जग्गा कित्ताकाट खुला गरेको मन्त्री शर्माले बताइन् ।
सरकारले भू–उपयोग पहिलो संशोधन नियमावली २०७९ स्वीकृति गर्ने निर्णय गरेपछि जग्गा कित्ताकाट खुला भएको बताइन् ।
उनले भू–उपयोग नियमावली नबनेका कारण घरजग्गा कारोबारमा कित्ताकाट तथा अंशबण्डा रोकिएकाले त्यसलाई सहज बनाउनको लागि मन्त्रीपरिषद्ले भू–उपयोग पहिलो संशोधन नियमावली २०७९ स्वीकृत गर्ने निर्णय गरेको जानकारी दिइन् ।
