राष्ट्रिय सभा बैठक स्थगित
काठमाडौँ । प्रधानमन्त्री पुष्पकमल दाहाल पत्नी सीता दाहालको निधनका कारण राष्ट्रियसभाको आज बस्ने भनिएको बैठक स्थगित भएको छ ।
बिहान ११ बजे बस्ने गरी बोलाइएको आजको बैठक विशेष कारणवश बिहीबारका लागि बस्ने गरी स्थगित भएको संसद् सचिवालयले जनाएको छ ।
प्रधानमन्त्री एबं माओवादी केन्द्रका अध्यक्ष पुष्मकमल दाहाल पत्नी सीता दाहालको आजै (बुधबार) पशुपति आर्यघाटमा अन्त्येष्टि गरिने भएको छ । त्यसअघि उनको पार्थिव शरिरलाई श्रद्धाञ्जलीका लागि पार्टी केन्द्रीय कार्यालय पेरिसडाँडामा राखिने माओवादी केन्द्रले जनाएको छ ।
माओवादी केन्द्रका अनुसार बिहान ११ बजेदेखि दिउँसो १ बजेसम्म पार्टी केन्द्रीय कार्यालयमा पेरिसडाँडामा श्रद्धाञ्जलीका लागि राखिने छ। साथै, आजै दिउँसो २ बजे उनको पशुपति आर्यघाटमा अन्त्येष्टि गरिने माओवादी केन्द्रका महासचिव देवप्रसाद गुरुङद्वारा जारी विज्ञप्तिमा जनाइएको छ ।
सीता दाहालको निधनबाट पार्टी, जनता र राष्ट्रका लागि अपूरणीय क्षति पुगेको जनाउँदै महासचिव गुरुङद्वारा जारी विज्ञप्तिमा भनिएको छ,‘उहाँले नेपालको कम्युनिष्ट आन्दोलनमा अत्यन्त महत्वपूर्ण र अविस्मरणीय योगदान पु¥याउनु भएको छ ।’
सीता पार्टी सिद्धान्तप्रतिको निष्ठा, उन्नत राजनीतिक चेृतना, पार्टी, जनता र राष्ट्रप्रतिको निःस्वार्थ एवं असीमित सम्पूर्ण विशेषता रहेको जनाउँदै माओवादीले भनेको छ,‘उहाँ आफ्ना योगदानमार्फत चीरकालसम्म स्मरणीय र भावी पुस्ताका लागि प्रेरणाको स्रोत रहनुहुनेछ ।’
प्रधानमन्त्री पत्नी सीताको आज बिहान ८ बजे ३३ मिनेट जाँदा उपचारको क्रममा नर्भिक अस्पतालमा निधन भएको हो ।
