टी-२० विश्व कपको खेल तालिका सार्वजनिक, नेपालका सबै खेल मुम्बईमा

ल्यानक्यास्टर, पेन्सिल्भेनिया/ अन्तर्राष्ट्रिय क्रिकेट परिषद् (आइसीसी) ले मंगलवार  टी-२० विश्व कपको खेल तालिका सार्वजनिक गरेको छ।

जस अन्तर्गत नेपाल समूह सीमा परेको छ र नेपालका समूह चरणका सबै खेल भारतको मुम्बईमा हुने छ। समूह सीमा नेपालसँगै इंग्ल्यान्ड, वेस्ट इन्डिज, बंगलादेश र इटाली छन्।

सन् २०२६ मा हुने टी-२० विश्वकप भारत र श्रीलङ्काले संयुक्त रुपमा आयोजना गर्दै छन्। नेपालले समूहको पहिलो खेल इंग्ल्यान्डसँग फेब्रुअरी ८ तारिख खेल्ने छ।  

विश्वकपमा नेपालले दोस्रो खेल इटाली सँग  फेब्रुअरी १२, तेस्रो खेल वेस्ट इन्डिज सँग फेब्रुअरी १५ र चौथो खेल बंगलादेश सँग  फेब्रुअरी १७ मा खेल्ने छ।

विश्व कपको पहिलो खेल फेब्रुअरी ७ तारिख मुम्बईको वानखेडे रंगशालामा आयोजक भारत र अमेरिका बीच हुने छ।

२० टोलीलाई ५–५ को चार समूहमा विभाजन गरिएको छ। प्रत्येक समूहका शीर्ष दुई टोली सुपर–८ मा पुग्नेछन्।

विश्व कपको फाइनल अहमदवादको नरेन्द्र मोदी स्टेडियममा मार्च ८ तारिख हुने छ।  

समूह विभाजन

•    समूह ए : भारत, अमेरिका, नामिबिया, नेदरल्यान्ड्स, पाकिस्तान

•    समूह बी : अष्ट्रेलिया, श्रीलंका, जिम्बाब्वे, आयरल्यान्ड, ओमान

•    समूह सी : इंग्ल्यान्ड, वेस्ट इन्डिज, बंगलादेश, इटाली, नेपाल

•    समूह डी : दक्षिण अफ्रिका, न्यूजिल्यान्ड, अफगानिस्तान, क्यानडा, युएई