चीन–अमेरिका बीच टिकटक विवाद समाधान गर्ने प्रारम्भिक सहमति

काठमाडौं । चीन र अमेरिकाबिच टिकटकसम्बन्धी विवाद समाधानका लागि सहकार्यमार्फत अघि बढ्ने प्रारम्भिक रूपरेखामा सहमति भएको छ ।

चीनका वाणिज्य मन्त्रालयअन्तर्गत अन्तर्राष्ट्रिय व्यापार प्रतिनिधि तथा उपमन्त्री ली चेंगगाङले यस्तो जानकारी दिएका हुन् ।

स्पेनको म्याड्रिडमा सम्पन्न चीन–अमेरिका आर्थिक तथा व्यापारिक वार्ताका क्रममा दुई पक्षबिच टिकटकसहित अन्य विषयमा खुला एवम् गहिरो छलफल भएको र त्यस क्रममा लगानी अवरोध घटाउने तथा पारस्परिक व्यापार–आर्थिक सहयोग प्रवर्द्धन गर्ने सहमति समेत भएको बताइएको छ ।

यसबारे सोधिएको प्रश्नमा चिनियाँ परराष्ट्र मन्त्रालयका प्रवक्ता लिन जियानले भने, ‘चीन–अमेरिका सम्बन्धको विकासमा राष्ट्रप्रमुख तहको कूटनीतिले रणनीतिक मार्ग निर्देशन दिने अपरिहार्य भूमिका खेल्छ ।’

उनले टिकटकसम्बन्धी विशिष्ट जानकारी भने सम्बद्ध निकायले सार्वजनिक गरिसकेको भन्दै थप विवरण नदिने बताए । विश्लेषकहरूले यो सहमतिको प्रारम्भिक रूपरेखालाई दुई मुलुकबिच हाल बिग्रँदै गएको सम्बन्ध सुधारतर्फको सकारात्मक सङ्केतका रूपमा हेरेका छन् ।