नेपाली खेलकुदले विकासमा नयाँ फड्को मारेको छ : मन्त्री चौधरी
काठमाडौं । युवा तथा खेलकुदमन्त्री तेजुलाल चौधरीले नेपाली खेलकुदले सीमित स्रोत र साधनका बाबजुद उल्लेखनीय उपलब्धिहरू हासिल गरेको बताएका छन् ।
राष्ट्रिय खेलकुद परिषद् (राखेप) को ६२ औँ वार्षिकोत्सवको अवसरमा बोल्दै मन्त्री चौधरीले विगत ६ दशकको इतिहास बोकेको नेपाली खेलकुदले विभिन्न आरोह–अवरोह पार गर्दै राष्ट्रिय तथा अन्तर्राष्ट्रिय स्तरमा पदक जितेर नेपाललाई विश्वमा चिनाएको उल्लेख गरे ।
उनले भने, ‘विगत ६ दशक भन्दा लामो इतिहास बोकेको नेपाली खेलकुदले विभिन्न आरोह, अवरोह पार गर्दै सीमित स्रोत र साधनका बाबजुद पनि विभिन्न राष्ट्रिय अन्तर्राष्ट्रिय खेलकुदका क्षेत्रमा पदक प्राप्त गरी विश्वसामु नेपालको झन्डा फहराई राष्ट्रको शिर उच्च राख्ने काम भएको छ । राष्ट्रिय र अन्तर्राष्ट्रिय पदक प्राप्तका लागि नेपाली खेलाडीहरूबाट उपलब्धि हासिल गरेको छ । जसले खेलकुदको विकासमा ठूलो फड्को मार्दै गएको देखिन्छ ।’
उनले खेल क्षेत्रको विकासका लागि सरकारले यो वर्ष विगतको तुलनामा बढी बजेट विनियोजन गरेको जानकारी दिँदै खेलाडीको वृद्धि र विकासमा अझ बढी ध्यान दिनुपर्नेमा जोड दिए ।
‘खेलकुद परिषद्ले आफ्नो क्षमतामा अझ बढी वृद्धि गर्दै खेलाडीहरूलाई वृद्धि र विकासमा समेत ध्यान दिन आवश्यक छ,’ उनले भने ‘नेपाल सरकारले खेल क्षेत्रको विकासको लागि विगतका तुलनामा यस वर्ष बजेट विनियोजन बढाउन सफल भएको छ ।’
यसै गरी कार्यक्रममा राष्ट्रिय खेलकुद परिषद्का अध्यक्ष टङ्क घिसिङले पनि पछिल्लो वर्ष नेपाली खेलकुदले थुप्रै उपलब्धि हासिल गरेको बताए । उनले भने, ‘अन्तर्राष्ट्रिय प्रतियोगितामा नेपाली खेलाडीले सफलता हात पारेका छन् भने देशभित्र पनि खेलकुद कार्यक्रमहरूको तीव्रता बढेको छ ।’
अध्यक्ष घिसिङले भौतिक पूर्वाधार निर्माणमा पनि उल्लेखनीय काम भएको जानकारी दिँदै नेपाली खेलकुदलाई विज्ञान र आधुनिक प्रविधिसँग जोड्ने काम सुरु भइसकेको बताए ।
उनले भने, ‘पछिल्लो आर्थिक वर्ष २०८१÷८२ को अवधिमा नेपाली खेलकुदले थुप्रै प्रगति गरेको छ । नेपाली खेलकुदलाई विश्वस्तको एउटा प्रतिस्पर्धात्मक पुर्याउने हाम्रो योजना अनुरूप नेपाली खेलकुदलाई विज्ञान र आधुनिक प्रविधिसँग जोड्ने कामको थालनी समेत गरेका छौँ ।’
