नेपाल र श्रीलंका बिचको खेल रद्द, दुवै टिमले अंक बाढे
फोर्ड लाउडरहिल, फ्लोरिडा/ आइसीसी टी २० विश्व कप क्रिकेट अन्तर्गत नेपाल र श्रीलंका बिचको खेल रद्द भएको छ। यो सँगै दुवै टिमले एक एक अंक बाढेका छन्।
अमेरिकाको फ्लोरिडा राज्यको फोर्ड लाउडरहिल स्थित सेन्ट्रल ब्रोवार्ड रंगशाला क्षेत्रमा दिनभरको भारी वर्षा भएका कारण खेल हुन नसकेको हो।
मैदानको आउट फिल्डमा पानी जमेको थियो। मुख्य पिच छोपिए पनि मैदानको अन्य क्षेत्र वर्षातका कारण भिजेको थियो।
भारी वर्षाका बिच पनि रंगशालामा आएका दर्शक निरास हुँदै फर्किएका थिए।
पूर्व निर्धारित तालिका अनुसार मंगलवार साँढे सात बजे खेल सुरु हुनु पर्ने थियो। सो समय सम्म वर्षा रोकिएको थिएन। साँढे आठ बजे मैदान निरीक्षण पछि खेल रद्द गरिएको आइसीसीले जनाएको हो।
खेल रद्द भए सँगै श्रीलंकाले प्रतियोगितामा तीन खेलबाट एक अंक जोडेको छ। श्रीलंकाले यस अगाडि दुई खेलमा हार बेहोरेको थियो। नेपालले भने दुई खेलमा एक अंक जोड्दै सुपर एटको सम्भावना कायमै राखेको छ। प्राविधिक रुपमा श्रीलंकाको पनि सम्भावना समाप्त भएको छैन्।
अब नेपालले सेन्ट भिसेन्टमा दक्षिण अफ्रिका र बंगलादेशसँग खेल्नेछ। दुवै टिमलाई हराए मात्र नेपाल सुपर-८ मा पुग्नेछ।
नेपाल पहिलो खेलमा नेदरल्याण्ड सँग पराजित भएको थियो।
