पेन्सिल्भेनियाको ल्यानक्यास्टरमा चिनियाँ नयाँ वर्ष: गुन्यु चोली र घलेकको महिमा
ल्यानक्यास्टर/ घमाइलो र निलो खुल्ला आकाश भए पनि पेन्सिलभेनियाको ऐतिहासिक शहर ल्यानक्यास्टरको आइतबारको मौषम चिसै थियो।
शनिवार बिहान ल्यानक्यास्टरमा वर्षको तेस्रो पटक हिमपात भएको थियो। साँझ पख देखि कठ्याङ्ग्रिने चिसो बढेको थियो। कालोपत्रे बाहेकका जमिनले हिउँको सिरक ओढेका थिए।
मानिसहरू बाक्ला ज्याकेट सहित अमेरिकाको ‘एक दिनको राजधानी’ तथा १५ औ राष्ट्रपति जेम्स बुकाननको घर नजिकै रहेको ल्यानक्यास्टर सिटीको केन्द्र बिन्दु क्विन्स स्ट्रिटमा रहेको पब्लिक लाइबेरी अगाडि झुम्मिन थालेका थिए।
जहाँ ल्यान्कास्टर एसियाली अमेरिकी प्यासिफिक टापु (एलएएपीआई) ले चिनियाँ नयाँ वर्ष (लुनर नयाँ) धूमधाम मनाउने कार्यक्रम राखेको थियो।
ल्यानक्यास्टरका रैथाने देखि, चिनिया, भारतीय, भियतनाम, कोरिया, नेपाल, भुटान लगायत थुप्रै देशका प्रतिनिधिहरू त्यहाँ उपस्थित भएका थिए। ल्यानक्यास्टर सिटीकी मेयर डेनीन स्वरेश स्वयम कार्यक्रममा उपस्थित थिइन।
क्विन्स स्ट्रिट स्थित बिन्स पार्क र इवेल प्लाजा खुल्ला ठाउँमा आयोजित कार्यक्रममा विभिन्न खानाका परिकार सहित सांस्कृतिक झाँकीहरू प्रदर्शन गरिएको थियो।
करिब तीन घण्टाको कार्यक्रमको मुख्य आकर्षक चिनियाँ पहिचान ड्रागनको झाँकी नै थियो। यस्तै मार्सल आर्टको प्रदर्शनीले पनि रौनक थपेकै थियो।
सहभागी सबै मुलुकको प्रतिनिधित्व हुने गरी ११ वटा नृत्य प्रस्तुत भए। जसमा तीन वटा नेपाली थिए। चिसो मौषमको प्रवाह नगरी नेपाली बालिकाहरूले गुन्यु चोली र गुरुङ पोशाकमा आफ्नो प्रस्तुति दिए।
ल्यानक्यास्टर निवासी नेपाली- नेपाली भाषी भुटानीहरू दिव्या घिमिरे, रितिका घिमिरे, दीपशिखा घिमिरे, रिया घिमिरे, निशिका सुवेदी र आयुशा चापागाईँले पालो पालो तीन वटा सामूहिक नृत्य प्रस्तुत गरेका थिए।
नेपाली पोशाक प्रति सहभागीले चासो लिएका थिए। ल्यानक्यास्टर सिटी मेयर डेनीन स्वरेशले नेपालको नामै लिएर नेपाली चेलीलाई धन्यवाद दिइन्।
भुटनीज कम्युनिटी डेभलभमेन्ट अफ ल्यानक्यास्टर (बीसीडी) का पूर्व सचिव ओम घिमिरेको पहलमा चिनियाँ नयाँ वर्षमा नेपाली संस्कृतिले स्थान पाएको हो।
‘म सन् २०१२ देखि २०१६ बीसीडीको सचिव हुँदा मिलर्सभिल युनिर्भर्सीटीका सांस्कृतिक विभागका अधिकारी सँग सम्पर्क थियो, त्यही मार्फत एलएएपी सँग सम्पर्क भएको हो।’ उनले भने।
गुन्यु चोली र गुरुङ पोशाक मार्फत ल्यानक्यास्टर सिटीमा नेपाली संस्कृतिलाई परिचित गराउन सफल भएका घिमिरेले समाज टाइम्स सँग भने, ‘नानीहरूले मिलर्सभिल विश्वविद्यालयमा कार्यक्रम गरेका थिए। त्यो बेला देखि हामी सम्पर्कमा छौ। अर्को वर्ष देखि अझ व्यापक रूपमा सहभागिता गराउने छौ।’
‘ल्यानक्यान्टरमा प्रायशः ठाउँमा यी नानीहरूले नै प्रस्तुति दिएका हुन्छन् उनीहरू सदैव तयारी अवस्थामा नै हुन्छन्, कार्यक्रममा लैजान पनि सजिलो हुन्छ।’ सहभागीको छनौट बारे घिमिरेले भने,’ अघिल्लो हप्ता सरस्वती पूजाको बेलामा पनि हामीले सबैलाई सूचना दिएका थियौ।’
पेन्सिल्भेनियाको ल्यानक्यास्टर काउन्टीमा नेपाली र नेपाली भाषी भुटानी गरी करिब पाँच हजार बढीको बसोबास रहेको तथ्याङ्क छ।
