सांसदहरुले खेल्ने भुमिका प्रभावकारी हुनुपर्ने सभामुख घिमिरेको भनाइ

काठमाडौं । प्रतिनिधिभाका सभामुख देवराज घिमिरेले सांसदहरुले खेल्ने भुमिका प्रभावकारी हुनु पर्ने बताएका छन् ।
शुक्रबार काठमाडौंमा आयोजित प्रतिनिधि सभाका महिला सांसदको प्रशिक्षण कार्यक्रममा सांसदहरुले कानूनको कार्यान्वयनमा पनि खेल्नु पर्ने भुमिकाबारे सचेत हुनु पर्ने बताए ।

उनले भने ‘ आफुहरुसँग धेरै जिम्मेवारी र चुनौती भएको हुनाले त्यो कार्य व्यवस्थित तरिकाले गर्न सक्नु पर्छ, संसदले खेल्ने भुमिका के हो र त्यसको गरिमालाई कसरी कायम गर्ने भन्ने कुरालाई प्राथमीकतामा राख्नु पर्छ । बनेका कानुनलाई कार्यन्वयन गराउन संसदले खेल्नुपर्ने भुमिकाहरुको बारेमा थाहा हुनुपर्छ ।’

सभामुख घिमिरेले जनताको भावनालाई संसदमा प्रस्तुत गर्नु पर्ने र सबै व्यवस्थाहरुलाई कार्यन्वयन गर्नु पर्ने बताए । उनले जनताको भावना र आकांक्षालाई पूरा गर्नको लागि संविधानको मातहातमा ऐन कानुन बनाएर जिम्मेवारी लिनुपर्ने पनि प्रष्ट पारे ।

कार्यक्रममा कानून, न्याय तथा संसदीय मामिलामन्त्री धनराज गुरुङले महिलाहरुको उपस्थिति र मन्तव्यले संसद अझै प्रभावकारी बनेको बताए । उनले संसदमा महिलाहरुको प्रभावकारिता अझै बढाउन कर्मशीलता हुन आवश्यक भएको पनि उल्लेख गरे ।

उनले भने ‘ संसदमा महिलाहरुको प्रभावकारी भुमिकालाई अझै प्रभावकारी बनाउने सन्दर्भमा कर्मशीलता प्रमुख कुरा हो । हामीले आफ्नो कर्मशीलता क्रियाशीलताबाट दक्षता प्राप्त गर्ने हो । महिला माननीय सदस्यहरुबाट व्यक्त भएका मन्तब्यहरुलाई नियालेर हेर्दा आफुलाई विद्यार्थी जस्तो लाग्छ । ’

उनले महिलाहरुको महत्पपूर्ण भुमिकाले नै संसद अझै तिखारिँदै गएको बताएका छन् ।
मन्त्री गुरुङले कुनै पनि सांसदले बोलेको कुराले संसदको गरिमा कति बढ्छ त्यो महत्वपूर्ण पक्ष भएको चर्चा गर्दंै त्यसले मुलुकलाई सुधार्न सक्ने बताए ।