कार्की आयोगको प्रतिवेदन प्रथम दृष्टिमा नै अपूर्ण : कांग्रेस
काठमाडौं । नेपाली कांग्रेसका प्रवक्ता देवराज चालिसेले गौरीबहादुर कार्की नेतृत्वको आयोगले दिएको प्रतिवेदन प्रथम दृष्टिमा नै अपूर्ण र अधुरो भएको बताएका छन् ।
बिहीबार ललितपुरको सानेपास्थित पार्टी केन्द्रीय कार्यालयमा आयोजित पत्रकार सम्मेलन गर्दै उनले प्रतिवेदनमा भदौ २३ को आन्दोलनबारे प्रकाश पार्न खोजिएको भएता पनि २४ गतेको घटनालाई अलपत्र छाडिएको बताए ।
उनले भने,‘अहिले जेनजी आन्दोलनको विषयमा प्रतिवेदन आएको छ । यसलाई विशेषगरी के भन्छौ भने प्रथम दृष्टिमा अपूर्ण र अधुरो देखियो । पूर्णता पाएको जस्तो देखिएको छैन् । २३ को आन्दोलनबारे जति प्रकाश पार्न खोजिएको छ, २४ गतेको घटनालाई अलपत्र छाडिएका जस्तो देखियो । यद्यपि त्यो प्रतिवेदन थप गम्भीर अध्ययन गर्छौ । हामीले एउटा धारणा बनाउन कानुनविद् ,प्रशासनमा अनुभव भएका, जेनजी आन्दोलनमा सहभागीहरूसँग छलफल गर्नेछौं ।’
त्यस्तै उनले जनादेश बाहेक शासनको स्रोत अरू केही नभएको बताए । पार्टीले हारे पनि प्रणालीले हार्न नहुने उनको भनाई छ ।
‘देशको राजनीतिक परिवर्तनमा विशिष्ट स्थिति देखा परेको छ । लोकतन्त्रको विकल्प लोकतन्त्र नै हो । जनादेश बाहेक शासनको स्रोत अरू केही भन्ने कुरा स्थापित भएको छ । पार्टी हार्ने जित्ने भइरहन्छ, तर प्रणाली हार्न हुँदैन,’उनले भने ।
