आईसीसी टी–२० विश्वकप क्रिकेट फाइनलः उपाधीका लागि भारत र न्यूजिल्याण्ड आमने–सामने हुँदै
गोबिन्द गुरुङ
कार्लाल, पेन्सिलभेनिया / आईसीसी टी–२० विश्वकप क्रिकेटको उपाधिका लागि भारत र न्यूजिल्याण्ड आमने–सामने हुँदै छन् ।
विश्व क्रिकेटका दुई बलिया टोलीबिच हुने यो फाइनल खेललाई लिएर विश्वभरका क्रिकेट समर्थकहरू उत्साहित छन्। सेमिफाइनलमा उत्कृष्ट प्रदर्शन गर्दै न्यूजिल्याण्डले दक्षिण अफ्रिकालाई पराजित गरी फाइनलमा स्थान बनाएको थियो ।
यता भारतले पनि बलियो प्रतिद्वन्द्वी इंग्ल्याण्डलाई हराउँदै आत्मविश्वासका साथ उपाधि नजिक पुगेको हो । दुवै टोली सन्तुलित मानिन्छन् । भारतसँग आक्रामक ब्याटिङ लाइनअप छ भने बलिङतर्फ पनि अनुभवी तथा प्रभावशाली खेलाडीहरू रहेका छन् ।
त्यसै गरी न्यूजिल्याण्ड पनि अनुशासित खेल शैलीका लागि परिचित टोली हो । उनीहरूसँग परिस्थितिअनुसार खेललाई नियन्त्रण गर्न सक्ने सक्षम ब्याट्सम्यान र प्रभावकारी बलरहरू छन् ।
इतिहास हेर्दा भारतले न्यूजिल्याण्डविरुद्ध आपसी भेटमा करिब ६० प्रतिशत जित हासिल गरेको तथ्याङ्क देखिन्छ । यसले भारतलाई केही मनोवैज्ञानिक फाइदा दिन सक्छ । फाइनल जस्तो ठूलो खेलमा अघिल्लो रेकर्डभन्दा पनि त्यस दिनको प्रदर्शन निर्णायक हुने गर्छ ।
दुवै टोली उपाधि जित्ने लक्ष्यका साथ मैदानमा उत्रने भएकाले खेल निकै प्रतिस्पर्धात्मक हुने अपेक्षा गरिएको छ ।
क्रिकेट समर्थकहरू पनि रोमाञ्चक तथा उच्चस्तरीय खेलको प्रतीक्षामा छन्, जहाँ सानो गल्तीले पनि खेलको परिणाम बदल्न सक्छ । त्यसैले भारत र न्यूजिल्याण्डबीचको यो फाइनल विश्व क्रिकेटका लागि विशेष आकर्षणको केन्द्र बनेको छ ।
टी–२० विश्वकपको यो १० औँ संस्करणसम्म आइपुग्दा १८० भन्दा माथिको स्कोर बनाउन सक्ने टोली नै उपाधिको प्रमुख दाबेदार बन्न सक्ने खेल विश्लेषकहरूले बताएका छन् ।
टी–२० क्रिकेट स्वभावतः उच्च स्कोरिङ खेल मानिए पनि विश्वकप फाइनलका तथ्याङ्क भने केही फरक देखिन्छन् । यसअघि सम्पन्न भएका नौ संस्करणका फाइनल खेलमध्ये कुनै पनि टोलीले १७६ रनभन्दा बढी स्कोर बनाउन सकेको छैन ।
यो हालसम्मको सबैभन्दा उच्च स्कोर सन् २०२४ को फाइनलमा भारतले बनाएको थियो । उक्त खेलमा भारतले दक्षिण अफ्रिकालाई पराजित गर्दै आफ्नो दोस्रो टी–२० विश्वकप उपाधि जितेको थियो ।
यस इतिहासलाई हेर्दा फाइनल खेलहरू प्रायः दबाबपूर्ण हुने र ठूलो स्कोर निकाल्न कठिन हुने देखिन्छ । त्यसैले यस वर्षको फाइनलमा पनि अत्यन्त उच्च स्कोर हुने सम्भावना कम मानिएको छ । आधुनिक टी–२० क्रिकेटको शैली हेर्दा ठूलो स्कोर असम्भव भने होइन ।
अघिल्ला नौ फाइनलमध्ये केवल तीन विजेता टोलीले पहिले ब्याटिङ गरेका थिए । तीमध्ये भारतले सन् २०२४ मा पहिले ब्याटिङ गर्दै ७ रनको रोमाञ्चक जित निकालेको थियो ।
टी–२० विश्वकप फाइनलमा सबैभन्दा ठूलो जित सन् २०१२ मा वेस्ट इन्डिजले ३६ रनले हासिल गरेको थियो ।
बाँकी छ फाइनल भने लक्ष्य पछ्याउने टोलीले जितेका थिए । ती खेलहरूमा विजेता टोलीले ८ विकेट (दुई पटक), ७ विकेट, ६ विकेट, ५ विकेट र ४ विकेटले जित निकाल्दै उपाधि हात पारेका थिए ।
भारत र इंग्ल्याण्डबीच भएको उच्च स्कोरिङ सेमिफाइनल हेरेर उत्साहित भएका क्रिकेट समर्थकहरूका लागि फाइनलअघि आएको पिचसम्बन्धी खबर थप रोचक बन्न सक्छ ।
उपलब्ध रिपोर्टअनुसार फाइनल खेलका लागि प्रयोग गरिने पिच सेमिफाइनलमा प्रयोग गरिएको माटोको मिश्रणबाट तयार पारिएको छ ।
मार्च ६, २०२६ मा सार्वजनिक भएको जानकारीअनुसार फाइनल खेलको केन्द्र पिच रातो र कालो माटोको मिश्रणबाट बनाइएको हुनेछ ।
यस्तो प्रकारको पिचमा सामान्यतया राम्रो बाउन्स हुने र सीम बलरहरूलाई पनि सहयोग पुग्ने अपेक्षा गरिन्छ। त्यसैले ब्याट्सम्यान र बलर दुवैका लागि खेल प्रतिस्पर्धात्मक बन्ने सम्भावना देखिएको छ ।
खेल विश्लेषकहरूले यस पिचमा औसत वा ‘पार’ स्कोर करिब २०० रन हुन सक्ने अनुमान गरेका छन्, जुन टी–२० विश्वकप फाइनलका लागि उच्च मानिन्छ ।
यो पिच लगभग नयाँ अवस्थामै रहेको बताइएको छ । यस टी–२० विश्वकप अवधिमा यसमा केवल एउटा खेल मात्रै खेलिएको थियो ।
जुन क्यानडा र दक्षिण अफ्रिकाबीच फेब्रुअरी ९ मा सम्पन्न भएको थियो । त्यसैले पिचमा धेरै घिसावट नआएको र ब्याटिङका लागि पनि राम्रो रहने अनुमान गरिएको छ ।
यस अवस्थाले दुवै टोलीलाई समान अवसर प्रदान गर्नेछ । यद्यपि भारतले इंग्ल्याण्डविरुद्ध यस्तै प्रकारको पिचमा जित हासिल गरिसकेकाले केही मनोवैज्ञानिक फाइदा पाउन सक्ने विश्लेषण गरिएको छ ।
यदि टी–२० विश्वकप फाइनलमा अहिलेसम्मकै उच्च स्कोर बन्ने हो भने, त्यसको सम्भावना यही खेलमा देखिएको छ ।
भारत र न्यूजिल्याण्डबीचको फाइनल खेल मार्च ८, २०२६ आइतवार हुनेछ । खेल अमेरिकाको समय अनुसार बिहान ७ः३० बजे र भारतीय समय अनुसार राति ८ः०० बजे सुरु हुनेछ ।
खेल अहमदाबादस्थित नरेन्द्र मोदी स्टेडियममा आयोजना गरिने छ ।
