बरफ चिरेर अमेरिकालाई चलायमान राख्दै कोस्ट गार्ड
वासिङ्टन / जाडो आँधी विन्टर स्टर्म फर्न पछि अमेरिकाका नदी, ताल र बन्दरगाहहरू बाक्लो बरफले ढाकिँदा देशको आपूर्ति प्रणाली नै जोखिममा परेको थियो। तर यही चुनौतीको बीच, अमेरिकी कोस्ट गार्डका आइसब्रेकर जहाजहरू बरफ चिर्दै अघि बढे—अमेरिकालाई रोकिन नदिन।
डिपार्टमेन्ट अफ होमल्यान्ड सेक्युरिटी (डीएचएस) की सचिव क्रिस्टी नोएमले कठोर जाडोमा पनि देशको जलमार्ग खुला राख्न सक्रिय कोस्ट गार्ड टोलीको खुलेर प्रशंसा गरिन्।
उनका अनुसार, पछिल्लो एक दशककै सबैभन्दा धेरै बरफ जमेको कतिपय क्षेत्रमा कोस्ट गार्डले ‘सेम्पर पाराटस’—सधैं तयार—भन्ने आफ्नो मूल मन्त्रलाई व्यवहारमै उतारेको छ।
३ हजार घण्टा बरफ चिर्दै
अहिलेसम्म २० वटा कोस्ट गार्ड कटर जहाजले ३,२४५ घण्टा आइसब्रेकिङ सेवा दिइसकेका छन्। यसले १४२ वटा व्यावसायिक जहाजको सुरक्षित आवतजावत सम्भव बनाएको छ भने ९८ प्रतिशतभन्दा बढी जलमार्ग सञ्चालनमा राख्न मद्दत पुगेको छ।
यी प्रयासले खाद्यान्न, इन्धन, हीटिङ आयल, सडकमा प्रयोग हुने नुनजस्ता अत्यावश्यक वस्तुहरूको आपूर्ति निरन्तर कायम राखेको छ।
ग्रेट लेक्सः अमेरिकाको औद्योगिक मुटु
ग्रेट लेक्स क्षेत्रमा आइसब्रेकिङ दुई ठूला अपरेसनमार्फत भइरहेको छ—अपरेसन कोल शोभल र अपरेसन टाकोनाइट। यी नामहरू नै त्यहाँ ढुवानी हुने मुख्य वस्तु—कोइला र टाकोनाइट (फलाम अयस्क)—बाट राखिएका हुन्।
अपरेसन टाकोनाइट अमेरिकाकै सबैभन्दा ठूलो घरेलु आइसब्रेकिङ अभियान हो। उत्तरी ग्रेट लेक्सका खानीबाट फलाम अयस्क ढुवानी गर्न जलमार्ग नै सबैभन्दा प्रभावकारी माध्यम भएकाले, यस अभियानले इस्पात उद्योगलाई जाडोमा पनि चलायमान राखेको छ।
त्यस्तै, लेक ह्युरनदेखि डेट्रोइट नदी प्रणाली हुँदै लेक इरी, लेक ओन्टारियो र सेन्ट लरेन्स सिवे सम्म फैलिएको अपरेसन कोल शोभलमा अमेरिकी र क्यानाडेली आइसब्रेकर्सले सहकार्य गर्दै खोज तथा उद्धार, बाढी न्यूनीकरण र व्यापारिक जहाजहरूको मार्ग खुला राख्ने काम गरिरहेका छन्।
कतिपय अवस्थामा त बरफले थुनिएका समुदायसम्म खाद्यान्न, इन्धन र स्वास्थ्य सेवाको पहुँच सुनिश्चित गर्न विशेष अपरेसनसमेत गरिएको छ।
उत्तरपूर्वी राज्यहरूमा ‘रिन्यु’ अभियान
मेनदेखि न्यू जर्सीसम्म फैलिएको उत्तरपूर्वी क्षेत्रमा अपरेसन रिन्यु: उत्तरपूर्वी अमेरिकाको जाडो मौसमका लागि विश्वसनीय ऊर्जा आपूर्ति अभियान सञ्चालनमा छ। यहाँ प्रयोग हुने हीटिङ आयलको ठूलो हिस्सा समुद्री मार्गबाट आउने भएकाले, यो अभियान क्षेत्रीय ऊर्जा सुरक्षाका लागि अत्यन्तै महत्वपूर्ण बनेको छ।
कोस्ट गार्डका जहाजहरूले बन्दरगाह र जलमार्गमा बरफ तोड्दै इन्धन, औषधि र अन्य आवश्यक सामग्रीको ढुवानी निर्बाध बनाइरहेका छन्। जोखिम बढी भएका क्षेत्रलाई प्राथमिकतामा राख्दै स्रोत परिचालन गरिनु, यस अभियानको विशेषता हो।
मध्य–अटलान्टिकमा असामान्य चुनौती
मिड–अटलान्टिक क्षेत्रमा सामान्यतया आइसब्रेकिङ आवश्यक नपर्ने भए पनि यसपालिको कठोर जाडोले त्यहाँ पनि कोस्ट गार्डलाई सक्रिय बनाएको छ।
फेरी, इन्धन बार्ज र व्यावसायिक जहाजका लागि मार्ग खुला राख्दै, सम्भावित जोखिम र पूर्वाधारमा पर्न सक्ने असरमाथि पनि निगरानी बढाइएको छ।
बरफमाथि जिम्मेवारी
कोस्ट गार्डले बन्दरगाह प्रशासन र समुद्री सरोकारवालासँग नजिकबाट समन्वय गर्दै आइसब्रेकिङ प्राथमिकता तय गरिरहेको छ। नाविकहरूलाई मौसम र बरफ पूर्वानुमानको निगरानी गर्न, यात्राको योजना सावधानीपूर्वक बनाउन र स्थानीय कोस्ट गार्ड सेक्टरसँग सम्पर्कमा रहन आग्रह गरिएको छ।
कठोर जाडो, बाक्लो बरफ र चुनौतीपूर्ण परिस्थितिका बीच पनि अमेरिकाको जीवनरेखा नरोकिनुमा—कोस्ट गार्डका ती जहाज र चालक दलहरूको अथक मेहनत छ, जो बरफ चिर्दै देशलाई अघि बढाइरहेका छन्।
फोटो : यूएस डिपार्टमेन्ट अफ होमल्याण्ड सेक्युरीटी
