डिसेम्बर २४, २०२५

नेपालले पहिलो पटक अन्तर्राष्ट्रिय स्तरको आईस स्केटिंङ प्रतियोगितामा सहभागिता जनाउने

काठमाडौँ/ नेपालले इतिहासमा पहिलो पटक अन्तर्राष्ट्रिय स्तरको आईस स्केटिंङ प्रतियोगितामा सहभागिता जनाउन लागेको हो ।

भारतीय आईस स्केटिंङ संघको आयोजना तथा एसियाली आईस स्केटिंङ महासंघ (एएसयु) र अन्तर्राष्ट्रिय स्केटिंङ महासंघ (आइएसयु) सँगको सहकार्यतामा हुन लागेको शर्ट ट्रयाक स्पिड आईस स्केटिंङ प्रतियोगितामा नेपालका तर्फ बाट २ जना महिला तथा ४ जना पुरुष खेलाडी हरुले सहभागिता जनाउन लागेका हुन् ।

नेपाल स्केटिंङ तथा स्केटबोर्डिंङ संघका अलक्ष्य अच्युत खनालका अनुसार प्रतियोगिता आगामी पुष १२ गते देखि १४ गते सम्म भारतको देहेरादुन स्थित माहाराना प्रताप स्पोर्ट्स कम्प्लेक्समा रहेको हिमाद्री अन्तर्राष्ट्रिय आईस स्केटिंङ रिंक सेन्टरमा आयोजना हुने छ।

प्रतियोगितामा नेपाल बाट सिनिअर पुरुष तर्फको १००० मिटरमा रमेश मोक्तान र अरुण खत्वे त्यस्तै जुनिअर महिला तर्फको ५०० मिटरमा परी गुरागाईँ र अल्का घिमिरे र पुरुष जुनिअर २५० मिटरमा जेभिअर जङ्ग थापा र सायोन अर्यालले भाग लिने निश्चित भएको छ।

त्यस्तै उक्त प्रतियोगितामा टिम म्यानेजरका रुमपा सन्जु श्रेष्ठ तथा अफिशिएलमा संघका महासचिव सत्य थापाले सहभागिता जनाउने छन्।

सो प्रतियोगितामा सहभागी हुन जान लागेको नेपाली स्केटिंङ खेलाडीहरूको टिमलाई बिदाइ गर्दै नेपाल ओलम्पिक कमिटीका अध्यक्ष जीवनराम श्रेष्ठले यस ऐतिहासिक सहभागिता नेपालको लागि खुसीको कुरा रहेको बताउँदै शीतकालीन ओलम्पिक खेलको रुपमा रहेको आईस स्केटिंङ खेल नेपालका लागि भूगोल सुहाउँदो खेल भएकोले यस खेलबाट नेपालले मेडल जित्ने विश्वास व्यक्त गरे।