एनआरएनए नागरिकता कार्यान्वयन नहुँदा पुँजी पलायन भयो : कुल आचार्य

काठमाडौं । गैर आवासीय नेपाली संघ (एनआरएनए) उच्चस्तरीय समितिका सदस्य कुल आचार्यले एकताबद्ध एनआरएनएको विकल्प नभएको बताएका छन् ।

उनले आफू एनआरएनए नागरिकता पाउने पहिलो व्यक्ति भएको उल्लेख गर्दै सो नागरिकता कार्यान्वयनका साथै समग्र विषयमा आवाज उठाउन पनि एकताबद्ध एनआरएनए हुनुपर्नेमा जोड दिए ।

शुक्रबार राजधानीमा भएको विशेष समारोहमा आचार्यले एनआरएनएहरू विभाजित हुँदा गैर आवासीय नेपालीहरूका मुद्दा ओझेल परेको गुनासो गरे ।

आफूहरूले कठिन परिस्थितिमा पनि काम गरेर एनआरएनएको एकता महाधिवेशन गराएको उल्लेख गर्दै अदालतले सदस्यता वितरण, अनलाइन प्रणाली, डेलिगेट्स र निर्वाचन प्रणालीमा सुधार गर्न दिएको सुझावलाई आत्मसात् गर्दै एकता प्रयास गरेको बताए । उनले अब अदालतले गल्ती नगर्नेमा आफू विश्वस्त रहेको सुनाए ।

‘कुनै समय ६५ देशमा अधिवेशन हुँदै गर्दा ५१  देशका डेलिगेट्सले मलाई अध्यक्ष हुन प्रस्ताव गर्नुभएको थियो । नागरिकता एक नम्बरमा लिनुभयो त्यसलाई कार्यान्वयन गर्न अध्यक्ष लिनुहोस् भन्दा त्याग गरेको हुँ । दम्भ देखाएनौँ, अवसरलाई दुरुपयोग भएको छ त्यसलाई बन्द गर्न अनुरोध गर्दछु,’ आचार्यले भने ।

एनआरएनए नागरिकता कार्यान्वयन नगरिएकोप्रति आक्रोश व्यक्त गर्दै आचार्यले भने,‘सरकारले हामीलाई नागरिकता दिन धेरै अल्झायो । छिमेकी देशको उदाहरण हेरेर पनि हामीलाई नागरिकता दिनका लागि सहजीकरण गरिदिनुपर्छ । छिमेकी भारतमा रहेका नेपालीहरूले पनि धेरै समस्या झेलिरहेका छन् । नागरिकताकै कारण सम्पत्ति लुकीलुकी सार्नुपर्ने र पुँजी पलायन हुने अवस्था छ ।’

त्यस्तै उनले सरकारले सामाजिक सुरक्षा कोषलाई पनि प्रभावकारी रुपमा काम गर्न नसकेको बताए । उनले सुरक्षा कोषको रकमलाई उत्पादनशील काममा लगानी गर्नुपर्ने बताए ।

शुक्रबार महेश श्रेष्ठ नेतृत्वको समितिलाई सर्वोच्चको परमादेशअनुसार एकताको महाधिवेशन गराएका शेष घले संयोजक रहेको उच्चस्तरीय समितिले ८३ लाख रुपैयाँभन्दा बढी नगद तथा जिन्सी सम्पत्ति हस्तान्तरण कार्यक्रमलाई सम्बोधन गर्दै उनले आफूले जस्तै संस्थाका लागि त्याग गर्न आव्हान गरे ।

समितिकी सदस्य जानकी गुरुङले उच्चस्तरीय समितिले गत वैशाखमा निर्वाचन गराएपछि ८३ लाख ६२ हजार २ सय २८ रुपैयाँ बचत भएको र  सो रकम नयाँ समितिलाई हस्तान्तरण गरिएको बताइन् ।

साथै कम्प्युटर, प्रिन्टर लगायतका जिन्सी सम्पत्तिहरू समेत नयाँ नेतृत्वलाई जिम्मा दिइएको उनले बताइन् ।

यसै गरी नवनिर्वाचित उपाध्यक्ष, महासचिव र अन्य पदाधिकारीहरूले पनि आ–आफ्नो धारणा राख्दै नयाँ कार्यकाललाई सहकार्य र साझेदारीको आधारमा अघि बढाउने प्रतिबद्धता जनाए । उनीहरूले प्रवासी नेपालीहरूको नागरिकता, दोहोरो नागरिकता, श्रमिक अधिकार, लगानी प्रवर्द्धन र आपत्कालीन अवस्थामै सहयोग पुर्याउने अभियानलाई प्राथमिकता दिने बताए ।

भर्चुअल माध्यमबाट कार्यक्रममा सहभागी समितिका सदस्य तथा पूर्व अध्यक्ष देवमान हिराचन, सदस्य विनोद कुँवर, अभियन्ता आरके शर्मासहित अन्य वक्ताहरूले पनि श्रेष्ठ नेतृत्वको टोलीलाई सफल कार्यकालको शुभकामना दिँदै संगठनलाई अझ लोकतान्त्रिक, समावेशी र पारदर्शी बनाउन आग्रह गरे । यस्तै कार्यक्रममा एनआरएनए सचिव चिन्तामणि सापकोटा, कोषाध्यक्ष ठाकुर ढुङ्गानालगायतको पनि सहभागिता रहेको थियो ।