ओलीले गरे बीपीको प्रशंसा : बीपीले नेपाल र भारतका लागि योगदान गरेका छन्
काठमाडौं । प्रधानमन्त्री केपी शर्मा ओलीले बीपी कोइरालाले नेपालका लागि मात्रै नभई भारतका लागि समेत काम गरेको बताएका छन्।
आइतबार पर्यटन मन्त्रालयद्वारा आयोजित ’बीपी कोइराला राष्ट्रिय पुरस्कार’ समर्पण समारोह कार्यक्रममा बोल्दै उनले भारतीय नेताहरू कठिन समयमा हुँदा उनले लुकेर काम गरेको बताएका हुन् ।
उनले भने,‘बीपी कोइराला नेपालका लागि मात्रै होइनन् । भारतमा ‘अंग्रेज भारत छोड्दो’ भन्ने आन्दोलनमा पनि पर्नु भएको थियो । भारत स्वतन्त्र गराउनका लागि समेत र भारतीय नेताहरू कठिन समयमा हुँदा बीपीले लुकेर समेत उनले काम गरेका थिए । त्यस कारण नेपालका समाजवादीहरूको र भारतका समाजवादीहरूसँगको भावनात्मक सम्बन्ध हुनु एउटा महत्त्वपूर्ण कुरा थियो ।’
उनले राजनीतिमा कतिखेरको जेल परिन्छ भन्न नसकिने भएकाले राजनीतिमा पूर्वाग्रह, प्रतिशोध भइरहने बताए । साथै उनले राजनीतिको दौडमा, परिवर्तनको झन्डा बोक्नेहरूमध्ये बीपी कोइराला समेत एक नेता रहेको उल्लेख गरे ।
