टेक्सास राज्यको क्यापिटलमा ऐतिहासिक वेसाक दिवसको उत्सव सम्पन्न

अस्टिन, टेक्सास / टेक्सास राज्यको क्यापिटलमा पहिलोपटक बुद्ध दिवस (वेसाक दिवस) यहि मे १५ तारिखका दिन मनाएको छ। यो समावेशी र रंगीन उत्सव नेपालिज बुद्धिष्ट एसोसिएसन, टेक्सास (NBAT) को आयोजना तथा हुओङ दाओ विपस्सना भावना केन्द्र र टेक्सासभरिका अन्य बौद्ध समुदायहरूको सहकार्यमा सम्पन्न भयो। त्यहि दिन बिहानै, टेक्सास राज्यको ८९औं विधानसभाको प्रतिनिधि सभाले वेसाक दिवसलाई पवित्र दिवसको रूपमा मान्यता दिने प्रस्ताव पारित गरेको थियो।

संसार भरि बुद्ध को जन्म, बुद्धत्व प्राप्ति, र महापरिनिर्वाण (मृत्यु) को सम्झना गर्दै वेसाक दिवस मनाउने चलन छ। बुद्धको जन्म इ.पू. ५६३ , लुम्बिनी, नेपाल भएको हो । वेसाक दिवस परम्परागत रूपमा मे महिनाको पूर्णिमाका दिन मनाइन्छ, र विश्वभरका करोडौं बौद्धहरूले यस पर्वलाई महिनाभर मनाउँछन्।

“यो उत्सव केवल ऐतिहासिक होइन यसको सन्देश पनि अत्यन्त शक्तिशाली छ,” एनबीएटीका महासचिव तथा कार्यक्रम सञ्चालक डा. नीरज बज्राचार्यले भने। ” हामी यहाँ टेक्सासको प्रतीकात्मक मुटुमा भेला भएका छौं, बुद्धप्रति कृतज्ञता व्यक्त गर्न र शान्ति, साक्षीता तथा एकताको मूल्यहरूलाई पुनः पुष्टि गर्न। आज ११ राष्ट्रबाट आएका ५९ भन्दा बढी श्रदेय भिक्षुहरूको सहभागिताले यसलाई साँच्चिकै अन्तर्राष्ट्रिय वेसाक दिवस बनाएको छ।””

कार्यक्रमको शुरुवात धार्मिक खण्डबाट भयो, जसको नेतृत्व श्रदेय भिक्षु पन्नाकाराले गर्नुभयो, जसको आध्यात्मिक मार्गदर्शनले समारोहलाई रूप दिन महत्त्वपूर्ण भूमिका खेलेको थियो। त्यसपछि, कार्यक्रमको सामान्य खण्डमा सांस्कृतिक प्रस्तुतिहरू, प्रमुख वक्ताहरूका सम्बोधन, र अन्तर-धार्मिक एकताको अभिव्यक्ति समावेश गरियो।

दिनको एक प्रमुख आकर्षण भनेको सुन्दर रूपमा सजिएको मञ्च थियो, जहाँ बुद्धको जन्म, बुद्धत्व प्राप्ति, र महापरिनिर्वाणको प्रतीक बुद्ध मूर्तिहरू श्रद्धा र सम्मानका साथ सजाइएको थियो। कार्यक्रमको धार्मिक खण्ड भियतनामी र नेपाली महिलाहरूले परम्परागत पोशाकमा बुद्धलाई फूल अर्पण गर्दै सुरु भएको थियो। त्यसपछि थेरवाद, महायान, र वज्रयान परम्पराका वरिष्ठतम भिक्षुहरूले वेसाक दिवसको सन्देश प्रस्तुत गरे, जसले विश्व बौद्ध समुदायभित्रको एकता र विविधतालाई सम्मान जनायो।

अर्को प्रेरणादायी क्षण अमेरिका भर निर्माणाधीन रहेका प्रमुख बौद्ध पूर्वाधार परियोजनाहरूको पहिचान थियो। तीमध्ये टेक्सासको फोर्ट वर्थस्थित हुओङ दाओ मन्दिरमा निर्माणाधीन धम्मचेतिया परियोजन बिशेष रुप मा उल्लेखनिय थियो । २०० मिलियन डलरको यो योजनाले ८४० स्तूपा निर्माण गर्ने लक्ष्य राखेको छ, जसले बुद्धको असीम करुणा र प्रज्ञाको प्रतीकता बोकेको छ। कार्यक्रममा भिक्षु पन्नाकाराले यस ऐतिहासिक परियोजनाको आध्यात्मिक र सांस्कृतिक महत्त्वबारे मन्तव्य दिनुभयो। साथै, परियोजनाको थ्री-डी मोडल पनि क्यापिटलको दक्षिणी सिँढीमा प्रदर्शन गरिएको थियो। यसका साथै डा. बज्राचार्य ले टेक्सासको यूलेस मा निर्माण हुने स्वोयम्भु स्तुपा को पनि उल्लेख गर्नु भएको थियो।

“हामी टेक्सास राज्यका सांसद सलमान भोजानीप्रति विशेष आभार प्रकट गर्न चाहन्छौं,” डा. बज्राचार्यले भने। उहाँको अन्तर-धार्मिक सद्भावप्रतिको प्रतिबद्धता र वेसाक दिवसलाई औपचारिक मान्यता दिने प्रयासले देखाउँछ कि हाम्रो मूल्यहरू टेक्सासको मूलधार संस्कृतिमा गहिरो रूपमा समाहित भएका छन् । ” भोजानीले ८९औं टेक्सास विधानसभाको प्रतिनिधि सभाबाट वेसाक दिवसको मान्यताको प्रस्ताव पारित गराउन महत्वपूर्ण भूमिका खेलेका थिए।

एनबीएटी अध्यक्ष मकर बज्राचार्यले बुद्ध को जन्म भूमि नेपालमा आफु जन्मिन पाएकोमा गर्व व्यक्त गर्दै सबैलाई बुद्धको जन्मस्थल लुम्बिनी भ्रमण गर्न हार्दिक आमन्त्रण गर्नुभयो, जुन शान्ति र आध्यात्मिक जागरणको कालजयी प्रतीक हो।

सांसद सलमान भोजानी बाहेक सांसद सुलेमान ललानी, सांसद वो , र अन्य विशिष्ट अतिथिहरूले पनि यस अवसरमा बधाई र कृतज्ञताको मन्तव्य दिनुभयो। यस प्रकार टेक्सास क्यापिटलमा पहिलोपटक आयोजना गरिएको यो ऐतिहासिक कार्यक्रम समुदायका सदस्यहरू, धार्मिक अगुवाहरू, र सार्वजनिक पदाधिकारीहरूको सहयोग र समर्थनले सम्भव भएको हो। कार्यक्रमको सभापतित्व श्रदेय ध्यान आचार्य मयौक ओ ले गर्नुभएको थियो।