सेन्ट लुइसको सिटीपार्क खेल मैदानको कहानी
पेन्सिल्भेनिया । अन्तर्राष्ट्रिय खेल जगतमा ठूलो आर्थिक लगानी हुने गरेको छ, जसमा टिभी सम्झौता, प्रायोजन र टिकट बिक्रीले महत्त्वपूर्ण भूमिका खेल्छन्। तर, कैयौं ठूला खेल परियोजनामा करदाताको लगानी पनि उत्तिकै महत्त्वपूर्ण हुने गरेको छ। सन् १९७० देखि २०२० सम्म, अमेरिकी राज्य र स्थानीय सरकारहरूले खेल स्टेडियम निर्माणका लागि ३३ अर्ब अमेरिकी डलर खर्च गरे, जसमा २००० पछिका २० वर्षमा मात्र २० अर्ब डलर खर्च गरिएको छ।
तर, सेन्ट लुइसको सिटीपार्क खेल मैदानले भने यस परम्परालाई तोडेर निजी लगानीमा निर्माण भएको छ, जसले यसलाई एक विशेष उदाहरणको रूपमा स्थापित गरेको छ।
सन् २०१५ मा एनएफएल टिम र्याम्सले सेन्ट लुइस छोडेर लस एन्जलस सरेपछि, शहरको केन्द्रमा आर्थिक संकट र खाली स्टेडियम छोडियो। यस अवस्थामा, स्थानीय टेलर परिवारले नेतृत्व गर्दै सेन्ट लुइस सिटी एससी फुटबल क्लब स्थापना गर्यो र सिटीपार्क निर्माण गर्यो।
यस परियोजनाका लागि टेलर परिवारले ३४.५ मिलियन डलरको कर छुट प्राप्त गरे पनि स्टेडियमको सम्पूर्ण निर्माण खर्च निजी स्रोतबाट गरियो। यसले सार्वजनिक वित्तीय भारलाई कम गर्दै दीर्घकालीन आर्थिक फाइदा हासिल गर्न नयाँ उपाय अपनायो।
सिटीपार्क सेन्ट लुइसको डाउनटाउन वेस्ट क्षेत्रमा निर्माण गरिएको छ, जुन पहिले मिल क्रीक भ्यालीको रूपमा चिनिन्थ्यो। यो क्षेत्र ऐतिहासिक रूपमा सामाजिक र आर्थिक रूपमा कमजोर रहँदै आएको थियो। कमजोर क्षेत्रमा खेल मैदान निर्माण गर्नुले उच्च आर्थिक प्रभाव पार्न सक्ने देखिन्छ, र यो रणनीति सिटीपार्कको लागि पनि उपयोगी सावित भएको छ।
सिटीपार्कले एनएफएल स्टेडियमहरूको जस्तै खाली रहने समस्या समाधान गर्न वार्षिक २०० भन्दा बढी कार्यक्रम आयोजना गर्ने योजना बनाएको छ। यसमा खेल मात्र नभई अन्य सांस्कृतिक र सामाजिक कार्यक्रमहरू पनि समेटिएका छन्।
सिटीपार्कले स्थानीय व्यवसायलाई प्राथमिकता दिँदै, सेन्ट लुइसका प्रमुख सेफ जेरार्ड क्राफ्टसँग साझेदारी गरी स्थानीय रेस्टुरेन्टलाई स्टेडियममा अवसर दिएको छ। यो साझेदारीमार्फत पहिलो दुई सिजनमा स्थानीय व्यवसायहरूले ५.५ मिलियन डलरको राजस्व आर्जन गरे।
सिटीपार्कको अनुभवले खेल मैदान निर्माण र सञ्चालनमा नयाँ मोडल प्रस्तुत गरेको छ। सार्वजनिक वित्तीय सहयोग बिना पनि, सही रणनीतिहरू अपनाउन सकेमा खेल मैदानले सामाजिक र आर्थिक सुधार ल्याउन सक्छ भन्ने तथ्य यसले प्रमाणित गरेको छ।
सिटीपार्कको आगामी भविष्य अझै लेखिन बाँकी छ, तर यसले सेन्ट लुइस र अन्य शहरका लागि नयाँ दिशा निर्देश गरेको छ। एजेन्सीबाट
