लेबनानको वेइरुतमा इजरायलको लगातार आक्रमण

काठमाडौं । इजरायलले शनिबार बेइरुतमा कम्तीमा दर्जनौं हवाई हमला गरेको छ, जुन हालसम्मको सबैभन्दा ठूलो आक्रमण हो। यस आक्रमणले लेबनानको राजधानीमा एक हप्ताभन्दा लामो समयपछि पुन: अशान्ति ल्याएको छ।

आक्रमणले शहरका दक्षिणी उपनगरहरूमा धुवाँका ठूला मुस्लाहरू देखिन थालेका छन्, जहाँ हिजबोल्लाहको मुख्य आधार छ। केही अवस्थामा, इजरायली सेनाले बासिन्दाहरूलाई बाहिर निस्कन चेतावनी दिएको थियो, तर समय निकै कम दिएको थियो – केही स्थानमा केवल केही मिनेटमात्र।

क्षति र हताहतको आंकलन अझै भइरहेको छ, तर कम्तीमा एउटा बहुमंजिला भवन पूर्ण रूपमा ध्वस्त भएको छ। इजरायली सेनाले हिजबोल्लाहको हतियार भण्डारण केन्द्र र दाहियेमा रहेको यसको गुप्तचर मुख्यालयलाई लक्ष्य बनाएको बताएको छ।

शनिबार, हिजबोल्लाहले इजरायलको हाइफा शहर र त्यसको उत्तरतिरका क्षेत्रहरूमा रकेट प्रहार गरेको छ। इजरायली चिकित्सकहरूले एक व्यक्तिको मृत्यु भएको पुष्टि गरेका छन्।

बेइरुतमा तीन दिनको शान्ति पछि, शनिबार दक्षिणी उपनगरहरू फेरि इजरायली हवाई आक्रमणको आवाजले गुञ्जिए। कालो धुवाँको मुस्ला सुरुमा देखियो, त्यसपछि खैरो धुवाँले आकाश ढाक्यो।

बेइरुतको विमानस्थल नजिकै दुई हमला भएको थियो, जुन अझै पनि नागरिक उडानहरूको लागि प्रयोग भइरहेको छ। एक घण्टाको अन्तरालमा, इजरायली डिफेन्स फोर्स (आईडीएफ ) ले यस क्षेत्रमा रहेका विभिन्न जिल्लाका बासिन्दाहरूलाई तीन वटा आपतकालीन विस्थापन चेतावनी जारी गर्यो।

इजरायली सेनाले बेइरुत बाहिरका क्षेत्रहरूलाई पनि निशाना बनाइरहेको छ। शहरको उत्तरतिर, एक जोडीले इजरायली ड्रोनबाट बच्न खोजिरहेको भिडियो सार्वजनिक भएको छ। उनीहरू राजमार्गको छेउमा आफ्नो गाडी रोकेर जङ्गलतिर भागेका थिए ।

तर लिबनानी राष्ट्रिय समाचार एजेन्सी ( एनएनए) का अनुसार उनीहरूलाई मिसाइल आक्रमणमा मारिएको बताइएको छ । लेबनानको अन्य स्थानमा, पूर्वी बेक्का उपत्यका क्षेत्रमा इजरायली हमलामा पाँच जनाको मृत्यु भएको छ, जसमा स्थानीय मेयर पनि रहेका छन्। एनएनएका अनुसार एउटा आवासीय अपार्टमेन्टमा गरिएको हमलामा केही अन्य घाइते भएका छन्। इजरायलले हिजबोल्लाहसँग सम्बन्धित लक्ष्यहरूलाई निशाना बनाएको बताएको छ।

ताजा इजरायली आक्रमणहरू आईडीएफले लेबनानबाट १०० भन्दा बढी रकेट इजरायलमा प्रहार गरिएको बताएको केही समयपछि भएको हो। एक ड्रोनले शनिबार बिहान इजरायली प्रधानमन्त्री बेन्जामिन नेतन्याहूको निजी निवासलाई पनि निशाना बनाएको थियो, तर आक्रमणको समयमा उनी घरमा थिएनन्।

हिजबोल्लाह र इजरायलबीचको सीमापारि भएको द्वन्द्व अक्टोबर २०२३ मा थप बढेको थियो, जब हिजबोल्लाहले गाजामा रहेको हमाससँग ऐक्यबद्धता जनाउँदै इजरायली ठाँउहरूमा प्रहार गर्न थालेको थियो।

अमेरिकी राष्ट्रपति जो बाइडनले लेबनानमा युद्धविरामको सम्भावनाबारे छलफल भइरहेको बताएका छन्, जहाँ इजरायल हिजबोल्लाहसँग लडिरहेको छ, तर गाजामा भने यो चुनौतीपूर्ण हुने बताएका छन्।

गाजामा युद्ध हमासले ७ अक्टोबर २०२३ मा इजरायलमा गरेको आक्रमणबाट सुरु भएको थियो, जसमा लगभग १,२०० व्यक्तिको मृत्यु भएको थियो र २५१ जनालाई गाजामा अपहरण गरिएको थियो। त्यसको जवाफमा, इजरायलले हमासलाई नष्ट गर्ने घोषणा गरेको थियो। तबदेखि गाजामा ४२,५०० भन्दा बढी मानिस मारिएको गाजामा रहेको हमासको स्वास्थ्य मन्त्रालयले जनाएको छ।