कोशी प्रदेश सरकारविरुद्ध सर्वोच्चको अन्तरिम आदेश
काठमाडौं । कोशी प्रदेश सरकारलाई सर्वोच्च अदालतले दीर्घकालीन असर पर्ने निर्णय नगर्न अन्तरिम आदेश दिएको छ ।
न्यायाधीश सपना प्रधान मल्लको एकल इजलासले मुद्दाको किनारा नलागेसम्म दीर्घकालीन असर पर्ने कुनै पनि काम नगर्नू/नगराउनू भनी अन्तरिम आदेश जारी गरेको हो ।
नेपाली कांग्रेस संसदीय दलका नेता उद्धव थापा सभामुख बाबुराम गौतमको समेत समर्थनमा मुख्यमन्त्री नियुक्त भएपछि नेकपा एमालेले उक्त नियुक्ति संविधानविपरीत भएको भन्दै सर्वोच्चमा रिद दायर गरेको थियो ।
इजलासले मुख्यमन्त्री नियुक्तिका लागि थापाले प्रदेश प्रमुखसमक्ष बुझाएको समर्थन, दाबी, हस्ताक्षरलगायत कागजात र प्रदेश प्रमुख पर्शुराम खापुङले गरेको नियुक्तिको निर्णयको सक्कल साउन ३ गतेभित्र झिकाउन आदेश दिएको छ । साउन ७ गतेका लागि पेसी तोक्न र निरन्तर सुनुवाइ गर्न पनि इजलासले आदेश पनि दिएको छ ।
