सीताको अन्त्येष्टि आजै पशुपतिमा
काठमाडौं । प्रधानमन्त्री एबं माओवादी केन्द्रका अध्यक्ष पुष्मकमल दाहाल पत्नी सीता दाहालको आजै (बुधबार) पशुपति आर्यघाटमा अन्त्येष्टि गरिने भएको छ ।
त्यसअघि उनको पार्थिव शरिरलाई श्रद्धाञ्जलीका लागि पार्टी केन्द्रीय कार्यालय पेरिसडाँडामा राखिने माओवादी केन्द्रले जनाएको छ ।
माओवादी केन्द्रका अनुसार बिहान ११ बजेदेखि दिउँसो १ बजेसम्म पार्टी केन्द्रीय कार्यालयमा पेरिसडाँडामा श्रद्धाञ्जलीका लागि राखिने छ। साथै, आजै दिउँसो २ बजे उनको पशुपति आर्यघाटमा अन्त्येष्टि गरिने माओवादी केन्द्रका महासचिव देवप्रसाद गुरुङद्वारा जारी विज्ञप्तिमा जनाइएको छ ।
सीता दाहालको निधनबाट पार्टी, जनता र राष्ट्रका लागि अपूरणीय क्षति पुगेको जनाउँदै महासचिव गुरुङद्वारा जारी विज्ञप्तिमा भनिएको छ,‘उहाँले नेपालको कम्युनिष्ट आन्दोलनमा अत्यन्त महत्वपूर्ण र अविस्मरणीय योगदान पुर्याउनु भएको छ ।’
सीता पार्टी सिद्धान्तप्रतिको निष्ठा, उन्नत राजनीतिक चेृतना, पार्टी, जनता र राष्ट्रप्रतिको निःस्वार्थ एवं असीमित सम्पूर्ण विशेषता रहेको जनाउँदै माओवादीले भनेको छ,‘उहाँ आफ्ना योगदानमार्फत चीरकालसम्म स्मरणीय र भावी पुस्ताका लागि प्रेरणाको स्रोत रहनुहुनेछ ।’
प्रधानमन्त्री पत्नी सीताको आज बिहान ८ बजे ३३ मिनेट जाँदा उपचारको क्रममा नर्भिक अस्पतालमा निधन भएको हो ।
नर्भिक पुगे शीर्ष नेता
प्रधानमन्त्रीसमेत रहेका माओवादी केन्द्रका अध्यक्ष पुष्पकमल दाहाल पत्नी सीता दाहालको निधनको खबरसँगै प्रमुख राजनीतिक दलका शीर्ष नेताहरू नर्भिक अस्पताल पुगेका छन् ।
कांग्रेस सभापति शेरबहादुर देउवा,आरजु राणा देउवा, राष्ट्रिय स्वतन्त्र पार्टीका सभापति रवि लामिछाने, स्वास्थ्य तथा जनसंख्या मन्त्री मोहन बहादुर बस्नेतसहितका शीर्ष नेताहरू अस्पताल पुगेका हुन् ।
उनीहरूले पत्नी वियोगमा रहेका प्रधानमन्त्री दाहालसहित परिवारमा समवेदना दिनुको साथै सीतालाई श्रद्धाञ्जली अर्पण गरेका छन् । प्रधानमन्त्री पत्नी सीताको आज बिहान ८ बजे ३३ मिनेट जाँदा उपचारको क्रममा नर्भिक अस्पतालमा निधन भएको हो ।
