नारायणगढ–मुग्लिन सडक पुनः अबरुद्ध, पहिरो पन्छाउने कार्य जारी
काठमाडौं । संघीय राजधानि जोड्ने महत्वपूर्ण सडक मार्गको रुपमा रहेको नारायणगढ–मुग्लिन सडक खण्डमा गएराति पुनःपहिरो गएसंगै सडक अवरुद्ध भएको छ ।
शुक्रबार गएको पहिरोको कारण निकै लामो समय लगाएर सुचारु गरिएको उक्त सडक चितवनको इच्छाकामना गाउँपालिका–५ स्थित तीन नम्बर पुलमा गए राति पहिरो खसेपछि सडक दुईतर्फी रुपमा अवरुद्ध बनेको हो ।
शुक्रबार पहिरोका कारण २७ घण्टा अवरुद्ध भएको सडक शनिबार साँझ ५ बजेदेखि सञ्चालनमा आएको थियो । तर,गएराती ११ बजेतिर तीन नम्बर पुल नजिक खसेको पहिरोले आज सडक दुइतर्फी अवरुद्ध भएको हो । पहिरो हटाउन आवश्यक उपकरण सहित तयारी अवस्था रहेको तथा सडक खुलाउने प्रयास भैरहेको इलाका प्रहरी कार्यालय मुग्लिनले जानाएको छ ।
एक साता देखि सोहि स्थानमा पटक–पटक पहिरो खस्दा सडक अवरुद्ध हुँदै आएको छ । आज दुईतर्फी रुपमा सडक अवरुद्ध भएकाले नबुझि सो बाटोबाट यात्रा नगर्न प्रहरीले सचेत पनि गराएको छ ।
पृथ्वीराजमार्ग अन्र्तगत नारायणगढ–मुग्लिन सडक खण्डमा बर्खा लागेसंगै विभिन्न स्थानमा पहिरो खस्दा धेरैले सास्ती खेप्दै आएका छन् । दैनिक १० हजार बढी सवारीसाधन गुडने तथा संघीय राजधानी काठमाडौं जोड्ने मुख्य मार्ग पटक पटक पहिरोका कारण अवरुद्ध हुँदा मुख्यगरि हजारौं यात्री मर्कामा पर्दै आएका छन् ।
