गायक चेतन राईको नयाँ राष्ट्रिय भाव बोकेको गीत “मेरो देश नेपाल” सार्वजनिक
गोबिन्द गुरुङ
कार्लाल पेन्सिलभेनिया / चर्चित गायक चेतन राईले नयाँ गीत “मेरो देश नेपाल” सार्वजनिक गरेका छन् ।
यस गीतमा राष्ट्रिय भाव प्रस्ट रूपमा व्यक्त गरिएको छ । गीतको शब्द राजाराम पौडेलले लेखेका हुन् । गायक राईले केवल गीत मात्र होइन, यससँग सम्बन्धित म्युजिक भिडियो पनि सार्वजनिक गरेका छन् । म्युजिक भिडियोको निर्देशन स्वयम गायक राईले नै गरेका हुन् । जसले उनको बहुमुखी प्रतिभालाई अझ प्रस्ट रूपमा देखाउँछ ।
विगत डेढ दशकदेखि नेपाली सङ्गीत क्षेत्रमा सक्रिय राईले अहिलेसम्म ६० भन्दा बढी गीतहरू गाइसकेका छन् ।
आफ्नो गायकीलाई अझ प्रभावकारी बनाउन उनले प्राय गीतका शब्द र सङ्गीत आफैँ सिर्जना गर्ने गरेका छन् । यसका अतिरिक्त, उनले केही म्युजिक भिडियोहरूको निर्देशन र अभिनय समेत गरेका छन् । आधुनिक तथा पप शैलीका गीतहरूमा आफ्नो विशेष योगदानका कारण गायक राई नेपाली सङ्गीत प्रेमीहरूबिच निकै लोकप्रिय छन् ।
गायक राईले आफ्नो सङ्गीत यात्रा अवधिभर नेपालका विभिन्न स्थानमा प्रस्तुति दिएका छन् । साथै, उनले विदेशमा समेत नेपाली सङ्गीतको झल्को प्रस्तुत गर्दै जापान, दुबई, बैंकक लगायतका देशहरूमा कार्यक्रम सञ्चालन गरेका छन् । यसले उनीलाई राष्ट्रिय मात्र नभई अन्तर्राष्ट्रिय स्तरमा पनि चिनिएका गायकको रूपमा स्थापित गरेको छ ।
विभिन्न मेला, महोत्सव तथा सङ्गीत कार्यक्रमहरूमा सक्रिय र व्यस्त रहेका गायक राईले थुप्रै अवार्ड र सम्मान पनि प्राप्त गरिसकेका छन् । यसमा म्युजिक खबर म्युजिक अवार्ड २०८०, जिनियस म्युजिक अवार्ड २०७९, रापती म्युजिक अवार्ड २०६८, हिमालयन इन्टरनेशनल अवार्ड २०८२, साधना दशक गायक सम्मान २०८१ लगायत दर्जनौँ सम्मान र पुरस्कार समावेश छन् ।
गायक राईको नयाँ गीत “मेरो देश नेपाल”ले केवल सङ्गीत प्रेमीहरूलाई मात्रै होइन, देशभक्त भाव राख्ने हरेक नेपालीलाई प्रभावित पार्ने विश्वास व्यक्त गरिएको छ । गीतमा समावेश गरिएको शब्द र सङ्गीतले देशको प्राकृतिक सुन्दरता, सांस्कृतिक धरोहर र जनताको साहस तथा आत्मसमर्पणलाई झल्काउने उद्देश्य राखेको छ।
साङ्गीतिक प्रस्तुति मात्र नभई गायक राईले निर्देशन र अभिनयमा देखाएको लगावले उनको बहुमुखी प्रतिभालाई अझ उजागर गरेको छ । नयाँ गीत र म्युजिक भिडियो सार्वजनिक भएपछि नेपाली सङ्गीत बजारमा यसको सकारात्मक प्रतिक्रिया देखिन थालेको छ । सङ्गीत प्रेमीहरूले यस गीतलाई विभिन्न मञ्च र अनलाइन प्लेटफर्ममार्फत समर्थन गरिरहेका छन् ।
गायक राईले आफ्नो बहु प्रतिभासहितको प्रस्तुति मार्फत नेपाली सङ्गीत क्षेत्रमा राष्ट्रिय भावना र आधुनिक सङ्गीत शैलीको समन्वय देखाएका छन्। “मेरो देश नेपाल” गीतले नेपाली युवा पुस्तासम्म देश प्रेम र सांस्कृतिक पहिचानको महत्त्व पुर्याउने अपेक्षा गरिएको छ ।
