जेनजी आन्दोलन सुशीला कार्कीलाई सडकबाट टिपेर सिंहदरबारमा राख्नका लागि थिएन : लिङ्देन
काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले जेनजी आन्दोलन केपी शर्मा ओलीलाई हटाउन मात्र होइन देशमा आमूल परिवर्तनको लागि भएको बताएका छन् ।
मंगलबार काठमाडौंमा आयोजित राप्रपाको जनप्रदर्शन र सभालाई सम्बोधन गर्दै उनले जेनजी आन्दोलन सुशीला कार्कीलाई सिंहदरबार राख्नको लागि मात्र होइन देशमा सुशासन र शान्ति स्थायित्वको सुनिश्चितता गर्नको लागि भएको बताए ।
उनले भने, ‘जनताको आक्रोश केवल त्यस बेलाका प्रधानमन्त्री केपी शर्मा ओलीलाई हटाएर सुशीला कार्कीलाई सडकबाट टिपेर सिंहदरबार राख्नको लागि मात्र भएको थिएन् । यो व्यवस्थामा नमिलेका कुराहरू परिवर्तन गर्न, देशमा सुशासनको सुनिश्चितता गर्न, शान्ति स्थायित्वको सुनिश्चितता गर्न र देशभित्रै युवाहरूले गरी खाने वातावरण निर्माण गर्नको लागि थियो । आमूल परिवर्तनको लागि त्यो विध्वंस भएको थियो ।’
साथै, उनले कसैले जनताको आक्रोश सम्बोधन गर्न चुनाव गराउने र मुलुकलाई अगाडि लैजाने भन्ने सोचेको छ भने त्यो भ्रम मात्र हुने जिकिर गरे । उनले जेनजी आन्दोलनको मागलाई सम्बोधन गर्ने हिसाबले मात्र निर्वाचनमा जानुपर्ने बताए ।
यस्तै, उनले राजा र राजनीतिक दलहरूका बीचमा एउटा नयाँ समझदारी गरेर अगाडि बढेर देशलाई दुर्घटनाबाट जोगाउ भनेर भन्दा राजनीतिक दलहरूले हाँसो ठट्टामा उडाएको बताए ।
उनले भने, ‘राजा र राजनीतिक दलहरूका बीचमा एउटा नयाँ समझदारी गरेर अगाडि जाऊ र देशलाई दुर्घटनाबाट जोगाउ भनेर भन्यौँ । तर राजनीतिक दलहरूले हाँसो ठट्टामा उडाए । सोचेको जस्तो देशको अवस्था छैन्, तपाईँहरू सच्चिनु हुन्न्, सुध्रिनु हुन्न् भने भाग्नुपर्ने दिन आउँछ है भनेर भनेका थियौँ । त्यसलाई त झन् मजामा उठाइयो । हामीले कसैलाई रिस गरेर भनेका थिएनौँ ।’
