स्वार्थको राजनीतिमा सहभागी भए, अब कमजोरीलाई स्वीकार गरी नयाँ अभियान मार्फत सङ्कल्प पुरा गर्नेछु : जनार्दन शर्मा
काठमाडौं । नेकपा माओवादी केन्द्रका नेता जनार्दन शर्मा ‘प्रभाकर’ ले स्वार्थको राजनीतिमा सहभागी भई गल्ती गरेको भन्दै कमजोरीलाई स्वीकार गरी नयाँ अभियान मार्फत सङ्कल्प पुरा गर्ने बताएका छन् ।
मंगलबार ललितपुरमा विशेष पत्रकार सम्मेलन गर्दै उनले आम जनता, मतदाता, कार्यकर्ता र समर्थनहरूलाई दुरुपयोग गर्ने प्रवृत्तिमा सहयोग गरेको भन्दै आफ्ना कमजोरीलाई स्वीकार गर्दै अब इमानदारीका साथ नयाँ अभियान मार्फत अघि बढ्ने बताएका हुन् ।
उनले भने, ‘आजसम्म आम जनता, मतदाता, कार्यकर्ता र समर्थनहरूलाई दुरुपयोग गरेर स्वार्थ केन्द्रित जो शासन गर्ने प्रवृत्ति जन्मियो त्यसमा हाम्रो पनि कमी छ, हामीले पनि गल्ती गरेका छौँ, हामी पनि त्यसमा सहभागी छौँ , कुनै न कुनै रुपमा साथ सहयोग गर्दै आयौँ, त्यसप्रति क्षमा चाहन्छौँ । र ती आफ्ना कमजोरीलाई स्वीकार गर्दै अब इमानदारीका साथ नयाँ अभियान मार्फत त्यसलाई पुरा गर्ने एउटा सङ्कल्प गर्न चाहन्छौँ।’
उनले शहीद, बेपत्ताका सपनाहरूलाई पुरा गर्न र घाइते योद्धाहरूका अपेक्षाहरू पुरा गर्न तयार रहेको समेत बताए ।
‘हामी एउटा ऐतिहासिक मोडमा छौँ । एउटा जोखिम, एउटा चुनौती, एउटा सम्भावना बोकेर हामी उपस्थित भएका छौँ । हामी शहीद, बेपत्ताका सपनाहरूलाई पुरा गर्ने उहाँहरूका परिवारजनका आशा र विश्वासहरू घाइते योद्धाहरूका अपेक्षाहरू उनीहरूमा आकाङ्क्षासहित तमाम प्रश्नहरूको जीवन्त जवाफ हामीले दिनुपर्ने छ । हामी त्यो दिनेछौँ । समग्र त्यो जिम्मा लिन तयार छौँ,’ उनले भने ।
उनले नेकपा बनाउँदा देशको राजनैतिक अस्थिरतालाई समाप्त पार्नका लागि वृहत् वामपन्थी एकता गरेको भन्दै त्यसमा आफूले हस्ताक्षर गरेको बताए ।
‘हामी भिन्न रुपमा राजनीति फोर्षलाई विक्षिप्त गर्न चाहन्छौँ । भिन्न दृष्टिकोणबाट अगाडि बढाउन चाहन्छौँ । एउटा जवाफ मैले दिनुपर्ने छ, धेरै कुराहरू उठिरहेका छन्, के भनिँदै छ भने नेकपा बनाउँदा यसले हस्ताक्षर गरेको थियो अहिले विरोध गरिरहेको छ भन्ने छ त्यसको कुनै साइनो र तुक छैन । किन छैन भने त्यस बेला वृहत् वामपन्थी एकता गरेर यो देशको राजनैतिक अस्थिरतालाई समाप्त पार्नका लागि गरिएको थियो,’ उनले भने ।
