बालेन र गृहमन्त्री विदेशीको आडमा चलिरहेका छन् : एमाले नेता बस्नेत

काठमाडौं । नेकपा एमालेका नेता महेश बस्नेतले गृहमन्त्री र काठमाडौं महानगरपालिकाका प्रमुख बालेन शाहमाथि गम्भीर आरोप लगाएका छन् ।

बुधबार एमाले अध्यक्ष केपी शर्मा ओलीको आगजनीबाट क्षतिग्रस्त बालकोटस्थित निजी निवासको अवलोकन गर्न पुगेका बस्नेतले गृहमन्त्री ओमप्रकाश अर्याल ‘अपराधीको मतियार’ भएको दाबी गरे ।

अवलोकनपछि सञ्चारकर्मीहरूसँग कुरा गर्दै बस्नेतले भने, ‘गुण्डुमा हामी ओलीको लागि ओली कुटी बनाइदिन्छौँ । यो जलाइएको घर राज्यको सम्पत्ति थियो । यसको लुटेरालाई समात्न गृहमन्त्रीलाई भन्छु । सरकारी कार्यालयहरू रातारात रंग लगाएर टालटुल पारिरहनु भएको छ । यसको मतलब गृहमन्त्री थुनिएका मान्छेहरू छुटाउँदै छन् । गृहमन्त्री चाहिँ अपराधीहरू लुटेरा ठगहरूको प्रमाण नष्ट गर्ने अभियानमा लाग्नु भएको छ । त्यस कारण उहाँ सम्पूर्ण अपराधको मतियार हो ।’

उनले गृहमन्त्रीमाथि सिंहदरबार परिसरमा जलाइएका मोटरसाइकल र सवारी साधनहरू संसद भवनको पछाडि लगेर लुकाएको आरोपसमेत लगाए ।

उनले भने, ‘सरकारी कार्यालयहरू रातारात रंग लगाएर टालटुल पारिरहनु भएको छ । यसको मतलब गृहमन्त्री थुनिएका मान्छेहरू छुटाउँदै छन् ।’

बस्नेतले गृहमन्त्रीमाथि अपराधीसँगको साँठगाँठ रहेको आरोप लगाउँदै भने, ‘गृहमन्त्री प्रमाण नष्ट गर्ने अभियानमा लाग्नु भएको छ । उहाँ सम्पूर्ण अपराधको मतियार हो ।’

यसै गरी उनले काठमाडौं महानगरपालिकाका प्रमुख बालेन शाह र उनको टिममाथि पनि बस्नेतले गम्भीर टिप्पणी गरे । उनले भने, ‘बालेन जी, गृहमन्त्रीजी र बालेनको जुन टिम छ, त्यो गोर्खाली भाइ पारितिरकै छन् । घुसपैठ गरेर नागरिकता बनाएका विदेशी मन भएका व्यक्तिहरूको आँडमा गृहमन्त्री बनेको देखिन्छ ।’

नेता बस्नेतले गृहमन्त्री ओमप्रकाश अर्यालमाथि विदेशी शक्ति र स्वदेशी घुसपैठियाको साथमा रही प्रमाण नष्ट गर्न सक्रिय रहेको आरोप लगाए ।

यसै गरी उनले जेनजी आन्दोलनमा मृत्यु भएकाहरूको छानबिनमा प्रधानमन्त्री सुशीला कार्की, गृहमन्त्री र बालेन शाह सबैमा छानबिन हुनुपर्ने बताए । उनले गृहमन्त्रीले काम गर्न नसके घोक्रे ठ्याक लगाउँदै कुर्सीबाट निकालेर आफूहरू  गृहमन्त्री बनेर काम गर्ने बताए ।

‘५४ जनाको हत्या भएको कुरा सुशीला कार्की, गृहमन्त्री र बालेन शाहसम्म सबैमा छानबिन हुनपर्छ । देशव्यापी रुपमा राष्ट्रिय युवा संघ नेपाले अहिलेसम्म २७ वटा जाहेरी हालेको छ । अब छानबिन हुन्छ कि हुँदैन । संसद पूर्नस्थापनाको प्रक्रियामा हामी गइसकेका छौँ  । अब एउटा ठूलो आन्दोलन लोकतान्त्रिक दलहरू मिलेर गर्ने छौँ । अब ओमप्रकाश जी ले गर्नु भएन भने ओमप्रकाश जीलाई घोक्रे ठ्याक लगाएर उहाँको ठाउँमा गएर हामी गर्ने छौँ ।’