संविधान परिमार्जन गर्न आवश्यक छ : विश्वप्रकाश शर्मा

जनकपुर । नेपाली कांग्रेसका महामन्त्री विश्वप्रकाश शर्माले संविधान परिमार्जनको आवश्यकता रहेको बताएका छन् ।

जनकपुरधाममा बिहीबार नेपाली कांग्रेस धनुषाको पार्टी कार्यालयको निरीक्षण तथा पार्टी कार्यकर्ताहरूसँग भेटघाट गर्दै महामन्त्री शर्माले पटक पटक भएको आन्दोलनकै कारण प्राप्त भएको संविधान परिमार्जन गर्दै सबैको अपनत्व हुने गरी मधेशी, कर्णालीवासी, आदिवासी, जनजाति, थारुलगायत सीमान्तकृतवर्गलाई थप अधिकार सम्पन्न बनाउनुपर्नेमा जोड दिए ।

यही भदौ २३ र २४ गते भएको जेनजी आन्दोलनको मुद्दाको सम्बोधन गर्न उनले सरकारसँग माग गरे । तर उनीहरूको माग सम्बोधन गर्ने नाममा पहिलाको हक अधिकार नमास्न समेत आग्रह गरे ।

जेनजी आन्दोलनको नाममा प्रतिनिधिसभा विघटन गर्नु दुःखद भएको टिप्पणीसमेत गरे । उनले जेनजी आन्दोलनको माग विघटन नभई उनीहरूको मुद्दाको सम्बोधन गर्नुपर्नेमा अन्यथा गर्नु नै गलत रहेको स्पष्ट पारे ।

उनले मधेश आन्दोलनबाट प्राप्त उपलब्धिको रक्षा गरी जेनजीको माग पूरा गर्न आग्रह गरे ।

अर्को प्रसङ्गमा उनले पार्टीहरूमा रूपान्तरण हुनुपर्ने बताए । उनले जेनजी आन्दोलनको क्रममा राजनीतिक पार्टीहरूमा पुस्तान्तरणको विषयले जोडतोड पाएकाले यसप्रति कांग्रेसभित्र पनि छलफल भइरहेको बताए ।

मधेश प्रदेश सरकारमा पनि कांग्रेसले दाबी गरेको छ । उनले मधेश प्रदेशको सरकार अब कांग्रेसले नेतृत्व गर्ने बताए ।

उनले मधेश प्रदेश स्वायत्तता रहेकाले कांग्रेस मधेश प्रदेशको सभापति कृष्णप्रसाद यादव रहेकाले उनले नै नेतृत्व हुने गरी प्रदेश सरकारका लागि पहलकदमी लिनुपर्ने बताए ।

उनले काम चलाऊ मुख्यमन्त्री सतीशकुमार सिंहले मधेश प्रदेश सरकारबाट मार्गप्रशस्त गर्न आग्रह गरे ।